"რუსეთ-სომხეთს შორის ჩვეულებრივი ურთიერთობაა, როგორც დიდ ოჯახში - ხან ასეა, ხან ისე" - „როსსოტრუდნიჩესტვო“ 11 ახალ „რუსულ სახლს“ გახსნის, მათ შორის 2-ს სომხეთში

სააგენტო „როსსოტრუდნიჩესტვოს“ ხელმძღვანელმა იგორ ჩაიკამ ხელი მოაწერა შეთანხმებებს 11 ახალი „რუსული სახლის“ გახსნის შესახებ. უკრაინაში რუსეთის სრულმასშტაბიანი შეიარაღებული აგრესიის დაწყების შემდეგ, საერთაშორისო სანქციებისა და დიპლომატიური წნეხის ფონზე, მსოფლიოს სხვადასხვა ქვეყანაში „როსსოტრუდნიჩესტვოს“ 13 წარმომადგენლობა დაიხურა. არსებული დანაკლისის კომპენსირებასა და გავლენის სფეროების გაფართოებას მოსკოვი ამჯერად აფრიკის მიმართულებით, ასევე დსთ-ის წევრ ქვეყნებში გეგმავს.

ხელმოწერის ცერემონიაზე უწყების ხელმძღვანელის მიერ გაკეთებული განცხადებებიდან ირკვევა, რომ ამ თერთმეტი პლატფორმიდან რვა აფრიკის ქვეყნებში გაიხსნება, ორი - სომხეთში, ხოლო პირველად პარტნიორული „რუსული სახლები“ დსთ-ის წევრ ქვეყნებში გამოჩნდება. ჩაიკამ ასევე გამოაცხადა „რუსული სახლების“ მუშაობის შეფასების პრინციპების ცვლილების შესახებ: ამიერიდან იგი კონკრეტულ შედეგებს - რუსული ენისა და რუსული განათლების პოპულარიზაციას, ასევე კულტურულ, ახალგაზრდულ, სამეცნიერო და ჰუმანიტარულ პროექტებს დაუკავშირდება.

2027 წლიდან სააგენტო მიკროგრანტების პროგრამას იწყებს. დაფინანსების მიღება შესაძლებელი იქნება საგანმანათლებლო, კულტურულ, სამეცნიერო-ტექნოლოგიურ, ახალგაზრდულ, ისტორიულ და სხვა პროექტებზე - როგორც ინდივიდუალურად, ისე ჯგუფის ან საზოგადოებრივი ორგანიზაციის შემადგენლობაში. გრანტების განაწილებას „როსსოტრუდნიჩესტვოს“ საზოგადოებრივი საბჭო გაუწევს კურირებას.

თერთმეტი შეთანხმებიდან ორს - სომხეთთან გაფორმებულ ხელშეკრულებებს - ჩაიკამ განსაკუთრებული ყურადღება დაუთმო და მოსკოვსა და ერევანს შორის არსებულ ურთიერთობებს ოჯახური უწოდა, სადაც „ყველაფერი ხდება“.„ჩვეულებრივი ურთიერთობაა, როგორც დიდ ოჯახში - ხან ასეა, ხან ისე.“ - განაცხადა ჩაიკამ.სომხეთში ერთბაშად ორი „რუსული სახლის“ გახსნას მან ორ ქვეყანას შორის ხალხთაშორისი, საგანმანათლებლო და კულტურული ორგანიზაციების პირდაპირი კავშირების ახალი შესაძლებლობა უწოდა.