რუსული მედიის ინფორმაციით, საქართველოდან ექსტრადირებული დმიტრი პუშკარევი რუსეთში, ბადრაგზე თავდასხმისას მოკლეს

რუსეთის სასჯელაღსრულების ფედერალური სამსახურის ცნობით, კაბარდო-ბალყარეთში, მურტაზოვოს სადგურის რაიონში მოკლეს დმიტრი პუშკარევი, რომელიც საქართველომ რუსეთს სექტემბრის ბოლოს გადასცა. შემთხვევა 2 ოქტომბერს, პატიმართა ეტაპირებისას მოხდა — პუშკარევი სხვა პატიმრებთან ერთად მატარებლით ვლადიკავკაზიდან ადლერისკენ გადაჰყავდათ.

ოფიციალური ვერსიით, პუშკარევი სპეციალურ ვაგონში ბადრაგს თავს დაესხა, სამსახურებრივი იარაღი წაართვა და გაქცევა სცადა. სროლის შედეგად დაიღუპა ბადრაგის ერთი თანამშრომელი, სამი კი დაიჭრა. სასჯელაღსრულების სამსახურის განცხადებით, თავდამსხმელის „ლიკვიდაცია“ ადგილზევე მოხდა.

თავდაპირველად რუსულ მედიაში ვრცელდებოდა ცნობები რამდენიმე პატიმრის მიერ ამბოხების მოწყობისა და მძევლების აყვანის შესახებ, თუმცა უწყებამ ეს ინფორმაცია უარყო და განმარტა, რომ თავდასხმა მხოლოდ ერთმა პირმა განახორციელა. მომხდარზე რუსეთის საგამოძიებო კომიტეტმა სისხლის სამართლის საქმე რამდენიმე მძიმე მუხლით აღძრა.

3 ოქტომბერს რუსულმა სახელმწიფო სააგენტო TASS-მა სამართალდამცავებზე დაყრდნობით დაადასტურა, რომ მოკლული სწორედ დმიტრი პუშკარევი იყო. მას რუსეთში ბრალად ედებოდა დანაშაულებრივი დაჯგუფების შექმნა, ნარკოტიკების შეძენა-გასაღება, კულტივირება და ინტერნეტმაღაზიის საშუალებით რეალიზაცია.

პუშკარევისა და კიდევ ერთი ბრალდებულის, კორნეი ფედუნოვის ექსტრადიციის შესახებ ინფორმაცია და ვიდეოკადრები რუსეთის გენერალურმა პროკურატურამ 24 სექტემბერს გამოაქვეყნა. პატიმრების გადაცემა ლარსის გამშვები პუნქტის ტერიტორიაზე მოხდა. საქართველოს პროკურატურას აღნიშნულ ექსტრადიციასთან დაკავშირებით ოფიციალური განცხადება არ გაუვრცელებია.