"არ არსებობს შანსი, EU-სთან მოლაპარაკებები დაიწყოს" - ევროპარლამენტარები კითხვაზე, რა მოხდება, თუ "ოცნება" რუსულ კანონს მიიღებს

რა მოხდება, თუ "ქართული ოცნება" რუსულ კანონს მიიღებს და რა იქნება საერთაშორისო საზოგადოების რეაგირება - "მთავარი არხის" ამ კითხვას ევროპარლამენტარები პასუხობენ.

ვიოლა ფონ კრამონი ამბობს, რომ კანონის მიღების შემთხვევაში, ევროკავშირში გაწევრიანებაზე მოლაპარაკებები არ დაიწყება. ევროპარლამენტარი ასევე ფიქრობს, რომ კანდიდატის სტატუსიც უკან უნდა გაიწვიონ.

"თუ ეს კანონი [რუსული კანონი] იქნება მიღებული, არ დაიწყება მოლაპარაკებები ევროკავშირში შესვლაზე. ასეთი ტიპის კანონის მიღებით ევროკავშირში თქვენ ვერ შეხვალთ და მე ვფიქრობ, რომ მაშინ კანდიდატის სტატუსი გამოწვეული უნდა იყოს," - ამბობს კრამონი.
"ჩემი ჯგუფის სახელით, შემიძლია ვთქვა, არ არსებობს შანსი, რომ მოლაპარაკებები დაიწყოს, ასეთი კანონის მიღების ფონზე," - აცხადებს რასა იუკნევიჩიენე

"მთავარის" კითხვას უპასუხა ანა ფოტიგამაც და საქართველოს მთავრობას მოუწოდა, რომ ქართველ ხალხს მოუსმინოს:

"ჩვენ დავაკვირდებით არჩევნებს იმისთვის, რომ დავრწმუნდეთ, ყველაფერი სწორად იქნება ჩატარებული. რასაკვირველია, პრობლემაა და მე მოვუწოდებ საქართველოს მთავრობას, ყური დაუგდოს ქართველ ხალხს. ვხედავთ მასიურ პროტესტს. ძალიან უცნაური იყო ისეთი კანონის ხელახლა შემოღება, რომელიც ამდენი დაპირისპირების მიზეზი გახდა," - განაცხადა ფოტიგამ.
რაც შეეხება პეტრას აუსტრევიჩუსს, ის აღნიშნავს, რომ რუსული კანონი და ასევე კანონი დაბეგრვაზე [იგივე ივანიშვილის "ოფშორების კანონი"]  ევროკავშირის პრინციპებს ეწინააღმდეგება:

"ეს კანონი [რუსული] და კანონი დაბეგვრაზე, ნამდვილად ეწინააღმდეგება ევროკავშირის პრინციპებს. ეს კანონი უარყოფს ორ რეკომენდაციას, რომელიც მიეცა საქართველოს და ეს შეიძლება იყოს დიდი დაბრკოლება საქართველოს ევროკავშირისკენ გზაზე," - ამბობს აუსტრევიჩუსი.შეგახსენებთ, რომ სტრასბურგში პარტია "ახალის" თანათავმჯდომარისა და ევროპარლამენტარების ერთობლივი ბრიფინგი გაიმართა. საუბრის მთავარი თემა რუსული კანონი იყო.