აშკარად მოსრიალდა კობახიძე საკუთარ ნათქვამზე... მაღალი ალბათობით, შექმნილია სქემა რუსეთის მიერ სანქციების გვერდის ასავლელად - ნიკა გვარამია

ოკუპირებულ აფხაზეთში საქართველოს ხელისუფლების მიერ კონტროლირებადი ტერიტორიიდან ბენზინის შეტანის ფაქტს ოპოზიციის ერთ-ერთი ლიდერი, ნიკა გვარამია, კიდევ ერთხელ ეხმაურება. გვარამიას თქმით, ხელისუფლება იტყუება, როდესაც აცხადებს, რომ ეს ქმედება „ოკუპირებული ტერიტორიების შესახებ“ კანონის სრული დაცვით განხორციელდა.

ოპოზიციონერი პოლიტიკოსი აღნიშნავს, რომ საწვავის შეტანა „სპეციალური საწარმოს“ სტატუსითაც კი პირდაპირ ეწინააღმდეგება საგადასახადო კოდექსს, რადგან ბენზინი აქციზური საქონელია. მისივე შეფასებით, არსებობს გონივრული ეჭვი, რომ შექმნილია სქემა რუსეთისთვის სანქციების გვერდის ასავლელად.

„ამასობაში, ნამდვილად მძიმე რეაქცია აქვს ქოცობას აფხაზეთის ბენზინის ბნელი ამბების მხილებაზე. პროპაგანდისტული მედია ოპოზიციას აფხაზებთან ურთიერთობის დალაგების მცდელობაში „ამხელს“, ხოლო ამ სტატუსის კომენტარში დადებული ტვ პირველის ვიდეოდან კი ირკვევა, რომ არანაირი თანხმობა არ არსებობდა. მეტიც, სპეცსაწარმოს მფლობელი არველაძე, რომელიც საუბრობს, თითქოს მან შეიტანა ბენზინი, განმარტავს, რომ ბენზინი როცა შეჰქონდა, მთავრობამ არც იცოდა და არც უნდა სცოდნოდა: აფხაზეთთან ვაჭრობის მუდმივი თანხმობა მომცეს და რას შევიტანდი, როდის და რამდენს, რატო დაინტერესდებოდაო. სრული ტყუილია, რა თქმა უნდა.

საქმე იმაშია, რომ ეს განმარტება ზოგადადაც ტყუილია, და საწვავის შემთხვევაში კი, აბსოლუტური ტყუილი. ბენზინზე თანხმობა საერთოდ არ არსებობს, უფრო სწორად, პირდაპირ გამორიცხულია საგადასახადო კოდექსის 24-ე სეკუნდა მუხლით: „სპეციალურ საწარმოს“ ეკრძალება ოკუპირებულ ტერიტორიაზე აქციზური საქონლის (გარდა ალკოჰოლიანი სასმელისა და თამბაქოს ნაწარმისა) მიწოდება. ბენზინი და სხვა საწვავი აქციზური საქონელია, ასე რომ, სპეციალური საწარმოს სტატუსით მისი კანონიერად შეტანა შეუძლებელია და გამორიცხული.

აშკარად მოსრიალდა კობახიძე საკუთარ ნათქვამზე. ცხადია, რომ არავითარი აქტი არაა გამოცემული და ჩადენილია დანაშაულიც, ქვეყნის სტრატეგიული ინტერესების საწინააღმდეგო აქტიც და, მაღალი ალბათობით, შექმნილია სქემა რუსეთის მიერ სანქციების გვერდის ასავლელად და სტრატეგიული დანიშნულების საქონლის შეძენაში დასახმარებლად.

სინამდვილეში, არავინ იცის ვის მიერ, რა და რამდენია შეტანილი. არ გამოვრიცხოთ, რომ ან იმგვარი ტექნიკა შეაქვთ (მაგალითად, სარეცხი მანქანები), საიდანაც ჩიპები ამოაქვთ რუსებს და სამხედრო მრეწველობაში იყენებენ, რადგან ჩიპების შესყიდვა სანქციების გამო არ შეუძლიათ, ან სულაც ორმაგი დანიშნულების პროდუქცია. ერთიცა და მეორეც ევროპული სანქციების თანახმად არ შეიძლება რუსეთს მიეწოდოს და ითვლება მისი საომარი მანქანის დახმარებად.

ისე შეიძლება აღმოჩნდეს, რომ ბენზინი ყველაზე ნაკლები პრობლემა იყოს და კობახიძის წამოცდენამ ისეთი მეხის დაცემა გამოიწვიოს, ჯერ რომ არ დასცემიათ.“ - წერს ნიკა გვარამია.