ჩვენი ოთხივე პოლიტიკური ფონდი იძულებული გახდა, დროებით შეეჩერებინა საქმიანობა - გერმანიის ელჩი

ორმა გერმანულმა პოლიტიკურმა ფონდმა საქართველოში ოფისების დახურვის შესახებ განაცხადა მას შემდეგ, რაც „გრანტების შესახებ“ ახალი კანონის ფარგლებში წარდგენილი პროექტების დაფინანსებაზე უარი მიიღო. OC Media-ს ცნობით, ეს ნაბიჯი ქვეყანაში უცხოური დაფინანსების შეზღუდვების საერთო ფონს უკავშირდება.

კონრად ადენაუერის ფონდმა (KAS) და ფრიდრიხ ნაუმანის ფონდმა „თავისუფლებისთვის“ (FNF) თბილისის ოფისები 30 სექტემბერს დახურეს. KAS-ში განაცხადეს, რომ ეს ნაბიჯი უნებლიე იყო, ხოლო FNF-ში პროცესს გარდაუვალი უწოდეს. ორივე ორგანიზაციის განაცხადი ადგილობრივ პარტნიორებთან მუშაობის გაგრძელებაზე საქართველოს მთავრობამ 28 ივლისს უარყო.

ფონდების წარმომადგენელთა შეფასებით, შექმნილმა პოლიტიკურმა და სამართლებრივმა ჩარჩომ შეუძლებელი გახადა მათი ძირითადი მისიის შესრულება. FNF-ის ინფორმაციით, ხელისუფლება ითხოვდა, რომ პროგრამის თითოეული ნაწილი მთავრობის პრიორიტეტებთან შესაბამისობაში ყოფილიყო, რაც ორგანიზაციას დამოუკიდებლობას ართმევდა.

გერმანიის ახლადდანიშნულმა ელჩმა საქართველოში, ბარბარა ფოსმა გერმანიის ერთიანობის დღისადმი მიძღვნილ ღონისძიებაზე აღნიშნა, რომ ოთხივე გერმანული პოლიტიკური ფონდი, რომლებიც ათწლეულების განმავლობაში უჭერდნენ მხარს საქართველოს ევროინტეგრაციას, იძულებული გახდა საქმიანობა დროებით შეეჩერებინა. მან ხაზი გაუსვა, რომ ეს მოვლენები უარყოფითად აისახება საქართველო-ევროკავშირის ურთიერთობებზე. ელჩმა ასევე ყურადღება გაამახვილა ილიას სახელმწიფო უნივერსიტეტის გარშემო არსებულ ვითარებაზე და აღნიშნა, რომ დაწესებულება, რომელიც გერმანიისგან მნიშვნელოვან მხარდაჭერას იღებდა, არსებობის საფრთხის წინაშე დგას.

„ჩვენი ოთხივე პოლიტიკური ფონდი, რომლებიც ათწლეულების განმავლობაში უჭერდნენ მხარს საქართველოსა და მის ხალხს ევროპული ინტეგრაციის გზაზე, იძულებული გახდა, დროებით შეეჩერებინა საქმიანობა საქართველოს მთავრობის გადაწყვეტილების გამო“. - განაცხადა ელჩმა

(ფონდები რომლებიხ საქართველოში მუშაობდნენ: კონრად ადენაუერის ფონდი , ფრიდრიხ ნაუმანის ფონდი, ჰაინრიხ ბიოლის ფონდი , ფრიდრიხ ებერტის ფონდი)

თავის მხრივ, საქართველოს პარლამენტის თავმჯდომარემ, შალვა პაპუაშვილმა უარყო ფონდების შეფასებები. მან განაცხადა, რომ კონრად ადენაუერის ფონდი გერმანიის „ქრისტიან-დემოკრატიულ კავშირთან“ (CDU) აფილირებული პოლიტიკური ორგანიზაციაა. პაპუაშვილის თქმით, ხელისუფლებამ ფონდს აკადემიური და საგანმანათლებლო საქმიანობის გაგრძელება შესთავაზა, თუმცა მათ ინტერესს კონკრეტულად პოლიტიკური პროექტები წარმოადგენდა. მან დასძინა, რომ უცხოურმა დონორებმა საქმიანობა საქართველოს მთავრობასთან უნდა შეათანხმონ.

KAS საქართველოში 2003 წლიდან, ხოლო FNF 2002 წლიდან საქმიანობდა. მათი პროექტები დემოკრატიის, კანონის უზენაესობის, საპარლამენტო განვითარების, თავისუფალი საზოგადოებისა და ევროინტეგრაციის ხელშეწყობას მოიცავდა.

FNF-ის რეგიონულმა ხელმძღვანელმა, ზაშა ტამმა OC Media-სთან საუბარში განმარტა, რომ ხელისუფლების მხრიდან თითოეული პროექტის განმარტების მოთხოვნისა და განაცხადების დასაბუთების გარეშე უარყოფის შემდეგ, ფონდის გამგეობამ ადგილზე მუშაობის შეწყვეტის გადაწყვეტილება მიიღო.

ორივე ფონდში აღნიშნავენ, რომ ინარჩუნებენ კავშირს ქართველ პარტნიორებთან, ხოლო KAS ინარჩუნებს იურიდიულ რეგისტრაციას, რათა პოლიტიკური ვითარების ცვლილების შემთხვევაში ქვეყანაში დაბრუნება შეძლოს.