დამღლელია ის საქმიანობა, რომელშიც ვართ ჩართული, ვგულისხმობ ფსიქოლოგიურ სტრესს - კობახიძე მდინარაძის წასვლაზე

მამუკა მდინარაძის პოლიტიკიდან წასვლას ირაკლი კობახიძე გამოეხმაურა და მისი წასვლა დამღლელ საქმიანობასა და ფსიქოლოგიურ სტრესს დაუკავშირა.

„მინდა მადლობა გადავუხადო მამუკა მდინარაძეს, მის მიერ გაწეული მნიშვნელოვანი საქმიანობისთვის, მისი სამსახურისთვის საკუთარი ქვეყნის წინაშე, მისი დამსახურებისთვის გუნდის წინაშე. ის ათი წლის განმავლობაში უამრავ რამეს აკეთებდა, რაც საბოლოო ჯამში, აისახა ქვეყნის განვითარებაზე და ჩვენი გუნდის გაძლიერებაზე. შესაბამისად, მას ეკუთვნის მხოლოდ და მხოლოდ მადლობა.

ჩვენთვის სამწუხაროა ის გადაწყვეტილება, რომელიც მან მიიღო. ჩვენ გვქონდა შეხვედრა გუშინ, ასევე დღეს, მათ შორის გვქონდა კონსულტაციები ბატონ ბიძინა ივანიშვილთან ერთად. ეს იყო მისი გადაწყვეტილება. ჩვენ ვცადეთ, ის დაგვერწმუნებინა საპირისპირო გადაწყვეტილებაში, თუმცა, მას მყარი პოზიცია ჰქონდა ჩამოყალიბებული.

გეგმები იცვლება ხოლმე, არამარტო მას, ჩვენ ყველას გვქონდა ჩამოყალიბებული გეგმა, თუმცა საბოლოო ჯამში მან მიიღო განსხვავებული გადაწყვეტილება. მისი დამოკიდებულება და პოზიცია იყო ის, რომ დამღლელია ის საქმიანობა, რომელშიც ჩვენ ყველა ვართ ჩართული. არ ვგულისხმობ ფიზიკურ დაღლას, ვგულისხმობ ფსიქოლოგიურ სტრესს, რომელიც არის პოლიტიკურ საქმიანობასთან დაკავშირებული და ჩვენ ამას, რა თქმა უნდა, გაგებით მოვეკიდეთ.

კიდევ ერთხელ მადლობას გადავუხდი მამუკა მდინარაძეს, იმისთვის, რაც მას აქვს გაკეთებული და ძალიან ბევრი რამ აქვს გაკეთებული როგორც ქვეყნისთვის, ისე გუნდისთვის", - განაცხადა პრემიერმა.