დავიწყე დარაჯად მუშაობა და დღეს თქვენ წინაშე ვარ წარმოდგენილი - უზენაესის მოსამართლეობის კანდიდატი

უზენაესი სასამართლოს მოსამართლეობის კანდიდატმა გენადი მაკარიძემ, იურიდიულ საკითხთა კომიტეტის სხდომაზე, პარტია „მოქალაქეების“ წევრის,  ლევან იოსელიანის კითხვას, უპასუხა, რომელიც დაინტერესდა, „ როგორ დაიწყო მისი შთამბეჭდავი კარიერა 28 წლის ასაკიდან, მაშინ, როდესაც ის სასამართლოში დარაჯად მუშაობდა“.

მაკარიძეემ აღნიშნა, რომ ყველა თანამდებობაზე ის პატიოსნად შრომობდა. მისივე განმარტებით, გადაწყვეტილი არასდროს არ ჰქონია, რომ მოსამართლეობა უნდოდა, თუმცა სკოლის დასრულების შემდგომ იურისტობა სურდა და „მოგვიანებით ოცნება აიხდინა და იურიდიულზე ჩააბარა“.

მაკარიძემ თქვა, რომ სასამართლო სისტემაში მისი მუშაობის დღიდან არ ყოფილა ადამიანი, ვისთან რაიმე ფორმით – ნათესაური, ახლობლური თუ მეგობრული ფორმით იყო კავშირში.

„დავიწყე მუშაობა დარაჯად და დღეს თქვენს წინაშე ვარ წარმოდგენილი – ერთადერთი რაც ვიცოდი, ყოველთვის უნდა მეშრომა, ვშრომობდი და ვშრომობდი პატიოსნად, რაც იმ დროისათვის იმ თანამდებობაზე მევალებოდა, სადაც ვიყავი.

თვითონ ეს პროფესია ძალიან მიყვარს. სკოლას რომ ვამთავრებდი, ვიცოდი და მინდოდა, რომ იურისტი ვყოფილიყავი, თუმცა იმთავითვე, რომ მოსამართლე გამოვსულიყავი, გადაწყვეტილი არ მქონდა. გადაწყვეტილი მქონდა, იურისტი ვყოფილიყავი და საბოლოოდ, მოგვიანებით ოცნება ავიხდინე და იურიდიულზე ჩავაბარე“, – განაცხადა გენადი მაკარიძემ