ფართო პოლიტიკური და საზოგადოებრივი კონსენსუსი რეჟიმის შესაცვლელად - ოპოზიციის ალიანსმა სამოქალაქო საზოგადოების წარმომადგენლებს გამარჯვების საერთო სტრატეგია გააცნო

ოპოზიციის ალიანსი დღეს სამოქალაქო საზოგადოების წარმომადგენლებს - საპროტესტო ჯგუფებს, პოლიტპატიმრების ოჯახებს, სტუდენტებს და სხვადასხვა სამოქალაქო მოძრაობის წარმომადგენლებს შეხვდა.

შეხვედრაზე სამოქალაქო საზოგადოების წარმომადგენლებს ოპოზიციურ პარტიებს შორის მიღწეული შეთანხმება და გამარჯვების საერთო სტრატეგია გააცნეს.

როგორც ალიანსის წევრი ოპოზიციონერი პოლიტიკოსები აცხადებენ, დემოკრატიული ოპოზიციისა და სამოქალაქო საზოგადოების მჭიდრო თანამშრომლობა გადამწყვეტი იქნება ბიძინა ივანიშვილის კრიმინალური, ავტოკრატიული რეჟიმის დასამარცხებლად და ქვეყნის დემოკრატიული მომავლის უზრუნველსაყოფად.

ალიანსი სამოქალაქო ჯგუფებთან აქტიურ თანამშრომლობას აპირებს, როგორც პროტესტის გაფართოებისთვის, ისე მეტი მოქალაქის დასარწმუნებლად, რომ ცვლილება მათ სასიცოცხლო ინტერესშია. მათი განცხადებით, ოპოზიციური ალიანსის მიზანია ფართო პოლიტიკური და საზოგადოებრივი კონსენსუსის შექმნა რეჟიმის შესაცვლელად, რათა ქართველ ხალხს მიეცეს შესაძლებლობა თავისუფალი, სამართლიანი არჩევნების გზით დაიბრუნოს მიტაცებული სახელმწიფო.

9 ოპოზიციური პარტია გამარჯვების საერთო სტრატეგიასა და თანამშრომლობის წესებზე 2 მარტს შეთანხმდა.  ალიანსში  შედიან შემდეგი პოლიტიკური სუბიექტები:

• ახალი
• გირჩი — მეტი თავისუფლება
• დროა
• ევროპული საქართველო
• ერთიანი ნაციონალური მოძრაობა
• ეროვნულ-დემოკრატიული პარტია
• თავისუფლების მოედანი
• სტრატეგია აღმაშენებელი
• ფედერალისტები