გააკეთოს მკაფიო განმარტებები ან შეწყვიტოს კამპანია - უგულავა "ქართული ოცნების" ფოთის მერობის კანდიდატზე

ოპოზიციის ფოთის მერობის კანდიდატი გიგი უგულავა, „ქართული ოცნების“ ფოთის მერობის კანდიდატ ბექა ვაჭარაძეს მოუწოდებს მკაფიო განმარტება გააკეთოს მის მიმართ გავრცელებულ ინფორმაციაზე, ან შეწყვიტოს საარჩევნო კამპანია.

"ვაჭარაძე არის მსხვერპლი, რადგან სხვა კანდიდატებისგან განსხვავებით, რომლებიც საკუთარი ნებით ხდებიან აგენტები, თანხმდებიან მოსმენას შანტაჟსა და გადაბირებას, ეს ადამიანი, როგორც ირკვევა, არის დაშანტაჟებული პირადი ცხოვრების მასალებით. ამიტომ, ის არის ცალსახად მსხვერპლი. მზად ვარ მას, როგორც მსხვერპლს გვერდზე ყველანაირად დავუდგე, იმიტომ, რომ ის, რაც ჩვენ ვიხილეთ, არის ამორალური და საზიზღრობა. ამავე დროს, მინდა მივმართო მას - ის იქნება მსხვერპლი საზოგადოებისა და ფოთელების წინაშე, თუ ის მკაფიო განმარტებას გააკეთებს იმ ამბავთან დაკავშირებით, რაც ვიხილეთ. ჩვენ მოვისმინეთ გამაოგნებელი რამ - იმის გამო, რომ ის სუს-მა დააშანტაჟა, ის ფაქტობრივად, მეთვალთვალედ, “ოპრიჩნიკად” მიუგზავნეს ასევე “ქართული ოცნების” დეპუტატს და ფაქტობრივ ოლიგარქს ფოთში, ბატონ ხახუბიას.

ეს არის გამაოგნებელი და ამაზრზენი. მინდა საზოგადოებას ვუთხრა, მსოფლიოს ოცი საუკეთესო მწერალი რომ აიღოთ, ამ ისტორიებს ვერავინ შეთხზავს და მოიგონებს. სამწუხაროდ, ეს არის რეალური ისტორიები. ბატონ ვაჭარაძეს მინდა მოვუწოდო, დღის ბოლომდე გააკეთოს მკაფიო განმარტებები ან შეწყვიტოს კამპანია, იმიტომ, რომ შეუძლებელია ასეთი წინაპირობით ადამიანმა საერთოდ რაიმე კამპანია აწარმოო“, - განაცხადა გიგი უგულავამ დღეს გამართულ პრესკონფერენციაზე.