"გზის გადაკეტვაზე ჯარიმები ვინც გაასაჩივრა, ნაწილს შსს უარს ეუბნება საჩივრის დაკმაყოფილებაზე... როგორ ვასაჩივრებთ" - ნიკა სიმონიშვილის რჩევები

იურისტი და საიას ყოფილი თავმჯდომარე ნიკა სიმონიშვილი წერს, რომ მოქალაქეებს, რომლებმაც გზის გადაკეტვაზე მიღებული ჯარიმები გაასაჩივრეს უარს ეუბნებიან საჩივრის დაკმაყოფილებაზე. იურისტი სოციალურ ქსელში რჩევებს და ინსტრუქციებს აქვეყნებს:

"გზის გადაკეტვაზე ჯარიმები ვინც გაასაჩივრა, მათ ნაწილს შსს-დან მოუვიდა დადგენილება [მეც, მათ შორის], რომლითაც უარს ეუბნებიან საჩივრის დაკმაყოფილებაზე [როგორც მოსალოდნელი იყო] და ამიტომ გასაჩივრების ახალ სტადიაზე გადადიან ისინი.

ბევრმა მკითხა ამ დღეებში, რა ვქნათო და ამიტომ აქ დავწერ ინსტრუქციებს, როგორ ვიქცევით ასეთ დროს და როგორ ვასაჩივრებთ.

როგორ უნდა მივიღო შსს-სგან დადგენილება?
შსს-მ ფოსტით უნდა გამოგიგზავნოთ და ჩაგაბაროთ დადგენილება და ამის შემდეგ შეგიძლიათ მიმართოთ თბილისის საქალაქო სასამართლოს. თუ ჯერ არ მოგსვლიათ, უბრალოდ დაელოდეთ და მანამდე ეს ამბები თქვენ არ გეხებათ.

რა ვადაში ვასაჩივრებთ?
შსს-ს დადგენილების ჩაბარებიდან 10 [კალენდარული] დღის ვადაში. ეს ვადა აუცილებლად უნდა დაიცვათ, თორემ სასამართლო საჩივარს არ დაუშვებს, მისი აღდგენა კი გამორიცხულია.

ვის მივმართავთ საჩივრით და რამე ფორმა ხომ არ აქვს?
საჩივრით უნდა მიმართოთ თბილისის საქალაქო სასამართლოს (აღმაშენებლის ხეივანი N64).

სამართალდარღვევებზე საჩივრისთვის კანონით არაა ფორმა დადგენილი, თუმცა გარკვეული პროცესუალური საკითხების გათვალისწინება მასში აუცილებელია. დეტალურად ამის აღწერა გამიჭირდება, თუმცა შაბლონის გაზიარება რა თქმა უნდა, შემიძლია (ყვითლად მონიშნული ადგილები იქნება შესაცვლელი).

რას ვითხოვთ საჩივარში?
ამ საჩივარში გვაქვს ორი მოთხოვნა: ა) საჯარიმო ქვითრის ბათილად ცნობა; ბ) შსს-ს დადგენილების ბათილად ცნობა.

ამიტომ საჩივარს ამ ორი დოკუმენტის ასლები აუცილებლად უნდა დაურთოთ.

საჩივარი როგორ შეგვაქვს?
საჩივარი და თანდართული დოკუმენტები სასამართლოს უნდა წარუდგინოთ ორ ეგზემპლარად (ერთი სასამართლოსთვის და მეორე შსს-ში იგზავნება). საჩივრის ორივე ეგზემპლარი უნდა იყოს ხელმოწერილი.

საჩივარი (ორ ეგზემპლარად) უნდა ჩააბაროთ სასამართლოს კანცელარიაში ან შეგიძლიათ გაგზავნოთ სასამართლოში ფოსტით.

საქართველოში თუ არ ვართ ამ დროს, როგორ ვიქცევით?
სასამართლო საქმის რეგისტრაციის სერვისის (ecourt.ge) მეშვეობით შესაძლებელია საჩივრის შეტანა, მაგრამ ამისთვის კვალიფიციური ელექტრონული ხელმოწერის ვადაში მყოფი სერტიფიკატი და ID ბარათის წამკითხველი გჭირდებათ.

ან უბრალოდ მინდობილობას გაუკეთებთ ადვოკატს ელექტრონული კომუნიკაციის საშუალებით ნოტარიუსთან და ის შეიტანს საჩივარს.

გასაჩივრებით ჯარიმის გადახდა ისევ გაჩერდება?
კი, სანამ საბოლოოდ არ ამოწურავთ გასაჩივრების პროცედურებს, მანამდე ჯარიმის გადახდა გაჩერებულია.

ჯარიმის გადახდის გასაჩერებლად რა უნდა გავაკეთოთ?
სასამართლო საჩივარს რომ მიიღებს წარმოებაში, ამ განჩინების ასლი უნდა აიღოთ სასამართლოში (ამისთვის თანაშემწეს უნდა დაუკავშირდეთ) და მიიტანოთ შსს-ში (საპატრულო პოლიციის დეპარტამენტში). სასამართლო თვითონ არ გზავნის ამ განჩინებას და ამიტომ ისევ ჩვენ გვიწევს ამის გაკეთება, დამატებითი თავის ტკივილი რომ ავირიდოთ თავიდან.

გასაჩივრებისთვის რამე გადასახდელი არის?
არა, ამ საჩივარზე სახელმწიფო ბაჟს არ იხდით.

რა ვადაში განიხილავს სასამართლო საქმეს?
პრაქტიკულად რომ გითხრათ, მინიმუმ რამდენიმეთვიანი პერსპექტივაა.

დანარჩენი ნაბიჯების შესახებ სხვა დროს დავწერ, ახლა მთავარი ისაა, სასამართლოში დროულად შეიტანოთ საჩივარი," - წერს ნიკა სიმონიშვილი.