"ისინი შეძლებენ აღადგინონ და გახადონ ჩვენი ურთიერთობები ჭეშმარიტად მეგობრული" - კოსაჩოვის შეფასებები ქართველი მოსწავლეების რუსულ პროექტში მონაწილეობაზე

"საქართველოს სხვადასხვა ქალაქის სკოლის მოსწავლეებმა მონაწილეობა დაასრულეს რუსულ პროექტ „ხსოვნის მატარებელში“. უფროსკლასელებმა რუს, ბელარუს და სხვა ქვეყნების თანატოლებთან ერთად ბელარუსისა და რუსეთის 13 ქალაქი მოინახულეს. პროექტის მარშრუტი „დიდი სამამულო ომის“ ისტორიას მიეძღვნა." - ამის შესახებ ინფორმაციას რუსული პროპაგანდისტული მედია და შვეიცარიის საელჩოში რუსეთის ინტერესების სექცია ავრცელებენ.

საიუბილეო სეზონი მინსკში დასრულდა, სადაც თბილისელმა მოსწავლემ, ორგანიზატორებთან ერთად, საერთო პანოზე მინსკის სიმბოლიკიანი აბრა დაამაგრა, როგორც „ხალხთა ერთიანობისა და საერთო ისტორიული მეხსიერების სიმბოლო“.

რუსულ პროექტში ქართველი მოსწავლეების მონაწილეობას კრემლის მაღალჩინოსნების შეფასებები მოჰყვა. რუსეთის ფედერაციის საბჭოს თავმჯდომარის მოადგილემ, კონსტანტინ კოსაჩოვმა, განსაკუთრებით გამოყო ქართველი ბავშვების ჩართულობა და მათ „კეთილი ნების ელჩები“ უწოდა:

„დარწმუნებული ვარ, ისინი შეძლებენ იმას, რაც, შესაძლოა, ჩვენ ვერ შევძელით — აღადგინონ და განავითარონ ჩვენი ურთიერთობები, გახადონ ისინი ჭეშმარიტად მეგობრული“.

ბელარუსის ეროვნული კრების რესპუბლიკის საბჭოს წევრმა, ალექსანდრ ლუკიანოვმა კი ხაზი გაუსვა ბელარუსის გათავისუფლებაში ქართველების წვლილს:„ვამაყობთ, რომ ჩვენს სამშობლოს მთელი მრავალეროვანი საბჭოთა ხალხი ათავისუფლებდა, რომლის პირველ რიგებშიც ჩვენი ძმები - ქართველები იდგნენ“.