"კოალიციური მმართველობა არის ევროპული ტიპის მმართველობა" - მამუკა ხაზარაძე თბილისის მერის მოადგილედ დასახელდა

,,ჩემი მოწოდება ცხოვრებაში არის საქმის კეთება და არასოდეს არ მიფიქრია საიდან გავაკეთებდი ამ საქმეს, დღეს არის უნიკალური შანსი იმისთვის, რომ ყველამ გავაკეთოთ ის, რაც ჭირდება ჩვენს თბილისს"- ეს განცხადება ,,ლელოს" ლიდერმა მამუკა ხაზარაძემ კოალიციური მთავრობის წარდგენისას გააკეთა, სადაც მას თბილისის მერის მოადგილეობა ხვდა წილად. 

ხაზარაძის განცხადებით 30 წლიანი პოსტ საბჭოთა ქვეყნის ისტორიაში, დღეს 20 ოქტომბერს ისტორიული დღეა. 

,,კოალიციური მმართველობა არის ევროპული ტიპის მმართველობა, ერთპარტიული კი რუსული. 30 წლიანი პოსტსაბჭოთა სივრცის ქვეყანაში დღეს არის ისტორიული დღე. კოალიციაში ჩემი ყოფნა ნიშნავს, იმას რომ არ გვაქვს ყველაფერზე თანხმობა, მაგრამ ჩვენ გვაქვს საერთო მიზანი და ეს მექანიზმი არის იმის დასამარცხებლად რასაც ქვია გამეფებული ნეპოტიზმი და კორუფცია ამ ქვეყანაში. ლელო შემოდის საკმაოდ სერიოზული წვლილით, ეს არის მარშალის გეგმა და პროფესიონალები, რომლებიც დაიკავებენ იმ ადგილებს თანაკოალიციის წევრებთან, ერთად, რომელიც განავითარებს თბილისს", - განაცხადა ხაზარაძემ. 

მისივე თქმით, კოალიციური მთავრობა პირველივე დღიდან დაიწყებს იმ რეფორმების გატარებას რომელიც ქალაქს ჭირდება და აქვე განმარტა, რომ არცერთი ის ადამიანი, ვინც წარმოადგენს ,,ქართულ ოცნებას" და არის თავისი საქმის პროფესიონალი, არ დატოვებს დაკავებულ თანამდებობას. 

,,ჩვენ პირველივე დღიდანვე დავიწყებთ ცვლილებებს, რომელიც მიმართული იქნება კონკრეტული ადამიანისთვის და თბილისის მაგალითი და მოდელი უნდა იყოს გადამდები ყველა ქალაქისთვის სადაც არჩევნები ტარდება. ჩვენ გვინდა  შემოვიტანოთ ახალგაზრდების და არაახალგაზრდებიც წინ წამოწევის სტანდარტი, ყველა ის პროფესიონალი ადამიანი ვინც ოცნებას წარმოადგენს და მუშაობს შეინარჩუნებს თავის ადგილს. ჩვენ გვევალება რომ ვიყოთ რიგითი ჯარისკაცები. გადამწყვეტი მომენტი დგება, რომ სახლიდან უნდა გამოვიდეთ და მივცეთ ცვლილებებს და განსხვავებებს ხმა", - განაცხადა ხაზარაძემ.