მაშინ, როდესაც მოქალაქეებს უკიდურეს გაჭირვებაში თავი ძლივს გააქვთ, მთავრობა ავტომობილებში დახარჯული 80 მილიონის შემდეგ, საბურავების შესაძენად 6,5 მილიონიან ტენდერს აცხადებს

ქვეყანაში არსებული უკიდურესი გაჭირვება, რომელიც მოქალაქეებს ყოველ დღე სულ უფრო და უფრო აწუხებთ, ფუფუნების მოყვარული მთავრობისთვის საერთოდ არაფერს ნიშნავს და კიდევ უფრო მეტი კომფორტის მოსაწყობად ბიუჯეტიდან თანხებს არ იშურებს.

მაშინ, როდესაც ადამიანები საკუთარი ვაშლის ბაღებს იმისთვის ჩეხავენ, რომ სახლში სითბო ჰქონდეთ, რადგან მთავრობამ შეშისთვის დაპირებული ვაუჩერები არ გამოუყო, მაშინ, როდესაც ავარიულ სახლებში ცხოვრება გაუსაძლისი ხდება და ადამიანები თვითმკვლელობამდე მიდიან, ხელისუფლების მაღალჩინოსნები ძვირად ღირებული ავტომობილებისთვის ასევე ძვირიანი საბურავების შეძენას გეგმავენ, რა თქმა უნდა, ასევე ხალხის ფულით.

მთავრობამ ავტომობილებში დახარჯული 80 მილიონის შემდეგ, გადაწყვიტა ამ ავტომობილებისთვის შესაფერისი საბურავები შეიძინოს და ახლა 6,5 მილიონიან ტენდერს აცხადებს.

"ბოლო არჩევნებიდან დღემდე, ხელისუფლებამ იყიდა 80 მილიონი ლარის ღირებულების ავტომანქანები. მაშინ, როდესაც დევნილებს ბინებს არ აძლევენ, მათ ფულს არ იპარავენ და ადამიანები თვითმკვლელობამდე მიჰყავთ. ახლა აღმოჩნდა, რომ 21 იანვარს გამოაცხადეს ტენდერი ჯამში 6,5 მილიონი ლარის ღირებულების საბურავების შესყიდვაზე. 80 მილიონი რომ გადაყარეს მანქანებში, იმას საბურავები ხომ მოჰყვა? რად უნდა ახლა ამ ღირებულების საბურავები მაშინ, როცა ტარიფები იზრდება, ადამიანები გაღარიბდა, დევნილები იმის გამო, რომ მათ ფულს იპარავენ, თვითმკვლელობამდე მიდიან. ეს არის გაუმართლებელი პოლიტიკა და არ არის გამორიცხული ამაში კორუფციული ელემენტიც", - ამბობს "ნაციონალური მოძრაობის" წევრი, გიორგი კაპანაძე.