„მე ნეგატიურ კონტექსტში ზელენსკი არასოდეს მიხსენებია“ - კობახიძე

ირაკლი კობახიძე ამბობს, რომ მას უკრაინის პრეზიდენტი ვოლოდიმირ ზელენსკი უარყოფით კონტექსტში არასდროს უხსენებია.

განცხადება "ქართული ოცნების" ლიდერმა მას შემდეგ გააკეთა რაც სომხეთიდან დაბრუნდა.

• 4 მაისს, სომხეთში, ევროპის პოლიტიკური გაერთიანების (EPC) სამიტის ფარგლებში, ირაკლი კობახიძე უკრაინის პრეზიდენტს შეხვდა.

რა თქმა უნდა, გამოწვევები არსებობს. ეს გამოწვევები დაგროვდა, თუმცა ჩვენს ქვეყნებს შორის მეგობრობას და ურთიერთობას ძალიან ხანგრძლივი ისტორია აქვს. მზად ვართ, ყველაფერი გავაკეთოთ, იმისთვის, რომ ეს ურთიერთობები მაქსიმალურად აღდგეს, ეს ყველაფერი აისახოს ურთიერთობებში ხელისუფლებებს შორის.

ყველა გონივრული ნაბიჯი ჩვენი მხრიდან შეიძლება გადაიდგას. ბუნებრივია, ვგულშემატკივრობთ უკრაინელს ხალხს, რომელიც დღეს ურთულეს მდგომარეობაშია. სოლიდარობას ვუცხადებთ უკრაინას, უკრაინელ ხალხს. ყველანაირად ვართ დაინტერესებულები, რომ არსებობდეს მეგობრული ურთიერთობები როგორ ქვეყნებს შორის, ასევე ხელისუფლებებს შორის. დაველოდოთ, მოვლენების განვითარებას.

მე პირადად ზელენსკი ნეგატიურ კონტექსტში არასდროს არ მიხსენებია და ამას აქვს ერთი მარტივი მიზეზი: მიუხედავად იმ პრობლემებისა, რომლებიც დაგროვილი იყო, ზელენსკი არის იმ ქვეყნის პრეზიდენტი, რომელიც დღეს ომის მდგომარეობაშია და ეს ჩვენი მეგობარი ქვეყანაა. აქედან გამომდინარე, მე ყოველთვის ვუფრთხილდებოდი ჩემს სიტყვებს პრეზიდენტ ზელენსკისთან დაკავშირებით. პრობლემები რაც იყო რა თქმა უნდა, არსად წასულა, თუმცა ჩვენ მომავალზე უნდა ვიყოთ ორიენტირებული", - თქვა კობახიძემ.

გუშინდედლის მსგავსად, კობახიძემ თქვა, რომ ზელენსკისთან შეხვედრის დეტალებზე ვერ ისაუბრებს, თუმცა უკრაინასთან არსებული პრობლემები კვლავაც რჩება.

დეტალებზე ვერ ვისაუბრებ. პრობლემები რაც იყო, ბუნებრივია, რჩება - არსად წასულა არც ადეიშვილი, არც ლორთქიფანიძე, არც ის განცხადებები, რომლებიც კეთდებოდა, არც ელჩის გაწვევის გადაწყვეტილება და ა.შ. ჩვენ გუშინ, არსებითად, ვიყავით კონცენტრირებულები მეგობრულ საუბარზე და ეს იყო სულისკვეთება, რაც იყო ძალიან მნიშვნელოვანი", - განაცხადა ირაკლი კობახიძემ.