„მეუფეებმა პატრიარქის ანდერძს რომ გადახედონ, იქნება ძალიან კარგი“ - გურამ მაჭარაშვილი

"მრევლის პოზიცია ყველამ კარგად იცის პატრიარქთან დაკავშირებით, ეს გამოჩნდა 17-21 მარტს და მე მგონი მეუფეებმა პატრიარქის ანდერძს რომ გადახედონ, იქნება ძალიან კარგი. ვაღიარებთ, რომ პატრიარქი იყო გამორჩეული პიროვნება ყველა თვალსაზრისით და მას 2017 წლიდან ჰქონდა თავისი პოზიცია თავის ანდერძთან დაკავშირებით, მოსაყდრესთან დაკავშირებით, ეს წლები მას ეს პოზიცია არ შეუცვლია და გამომდინარე აქედან, რა თქმა უნდა, საბოლოო ჯამში საერთო კრების და ამ შემთხვევაში სინოდის გადასაწყვეტია პატრიარქის არჩევა... ჩვენ არაფერი არ გვითქვამს, რადგან თქვენ დასვით ეს კითხვა, რომ საჯაროდ გამოვიდა ერთი თუ ორი მეუფე და საუბრობს ჩარევაზე, მაშინ კონკრეტული მაგალითებიც უნდა ითქვას ვინ ჩაერია, იყო თუ არა ჩარევის მცდელობა" | ამბობს ხალხის ძალის წევრი გურამ მაჭარაშვილი.

გუშინ, 19 აპრილს ბოდბელმა ეპისკოპოსმა იაკობმა და მარნეულისა და ჰუჯაბის ეპისკოპოსმა გიორგი ჯამდელიანმა პატრიარქის არჩევნებში ჩარევისგან ყველას თავის შეკავებისკენ მოუწოდეს. "მინდა მივმართო ხელისუფლებას და ვთხოვო: ნუ ჩაერევა საპატრიარქო არჩევნებში ნურავის სასარგებლოდ!" | ნათქვამია გიორგი ჯამდელიანის მიერ გავრცელებულ განცხადებაში.

მეუფე იაკობმა კი თქვა:

 "ცხვირს არავის არსად არ ჩავაყოფინებთ! კარგად გაითვალისწინოს ყველამ! მაგის გარანტები ჩვენ ვართ. პატრიარქსაც ავირჩევთ, ჩვენით ავირჩევთ, გარედან დანიშნული არ გვეყოლება... ილუზიები ყველამ დაივიწყოს. "