"მიტაცებულ სტრუქტურებთან სამართლებრივ დისკუსიაში დრო არ უნდა დავკარგოთ... ივანიშვილი კანონებით არ მოქმედებს...უზურპატორის ძალას, ძალა უნდა დავუპირისპიროთ" - ბაჩუკი ქარდავა

ეროვნულ-დემოკრატიული პარტიის ლიდერი ბაჩუკი ქარდავა აცხადებს, რომ რადგან 2024 წლის საპარლამენტო არჩევნები ხელისუფლების ბოროტად გამოყენების გზით გაყალბდა, რასაც როგორც საქართველოში, ასევე  დემოკრატიული დასავლეთის ყველა ქვეყანა თუ საერთაშორისო ორგანიზაცია აღიარებს, კონსტიტუციური ველიდან გასული ხელისუფლებისადმი დაუმორჩილებლობა სამოქალაქო ვალდებულებაა.

"ისევე, როგორც არ არსებობს ნახევრად ორსული, ასევე არ არსებობს ნახევრად ლეგიტუმური, ნახევრად სამართლიანი... კანონი ან კანონობს ან - არა.

2024 წლის საპარლამენტო არჩევნების შედეგები ხელისუფლების ბოროტად გამოყენების გზით გაყალბდა. დაირღვა კონსტიტუცია და ყველა შესაბამისი კანონი.

მოსახლეობის 50%-ს პლუს ერთმა მოქალაქემ მხარი არ დაუჭირა ყოფილ ხელისუფლებას. შედეგად, ივანიშვილმა ზურგი შეაქცია კონსტიტუციას, ყველა კოდექსს, კანონსა თუ მუხლს...

ფაქტია, ქვეყნის შიგნით და გარეთ აღიარებულია - ივანიშვილი უზურპატორია, პარლამენტი არალეგიტუმურია...

კარგია, რომ სამართლებრივი არგუმენტები საჭიროზე მეტი იქნა მოძიებული. მათ შორის იმგვარი ფუნდამენტური ხასიათის, როგორიცაა ხმის მიცემის ფარულობის დარღვევა.

ნებისმიერი მექანიზმი, რომელსაც ოპოზიცია არალეგიტიმურობის დამატებითი დემონსტრირებისთვის გამოიყენებს - იქნება ეს ცესკოში განაცხადი არალეგიტიმურ პარლამენტზე უარის თქმის და ა.შ. არის საჭირო, მაგრამ ისინი დამხმარე კომპონენტებია. ყველა სამართლებრივი პროცედურა უნდა გავიაროთ, მაგრამ უზურპატორ ივანიშვილის მიერ მიტაცებული სტრუქტურების სამართლებრივ არგუმენტების წინააღმდეგ დისკუსიაში დრო არ უნდა დავკარგოთ.

მოცემულობა ასეთია :

ივანიშვილი ძალაზე დაყრდნობით ცდილობს შეინარჩუნოს ხელისუფლება, და სამწუხაროდ, ჩვენც გვრჩება ერთადერთი გზა, სხვა ყველაფერი მეორეხარისხოვანია - უზურპატორის ძალას ძალა უნდა დავუპირისპიროთ და ეს ძალა დღეს საქართველოს მოქალაქეებშია.

კონსტიტუციური ველიდან გასული ხელისუფლების წინააღმდეგ დაუმორჩილებლობა სამოქალაქო ვალდებულებაც კია.

კანონიერი პარლამენტის მუშაობისთვის ხელის შეშლა დანაშაულია, მაგრამ მიტაცებული პარლმანეტის ძალით დაბრუნება სრულიად ლეგიტუმურია.

ახლა დგას საკითხი ასე - როდის შეიკრიბება ის ძალა, რომელიც მიტაცებულ ძალას დაამარცხებს?

ეს აუცილებლად მოხდება და უმეტესი დრო სწორედ ამ ძალის მობილიზებას უნდა დავუთმოთ."

აცხადებს ბაჩუკი ქარდავა,