მთავრობა 10 მილიონ ლარზე მეტი ღირებულების 164 ჰიბრიდულ ავტომობილს ყიდულობს

საქართველოს მთავრობის მიერ ახლად შექმნილმა „ცენტრალურმა შემსყიდველმა ორგანომ“ ავტომობილების შესაძენად კიდევ ერთი ტენდერი გამოაცხადა.

სატენდერო დოკუმენტაციაზე დაყრდნობით ინფორმაციას სააგენტო IPN-ი ავრცელებს. სახელმწიფო შესყიდვების სააგენტოს ვებგვერდზე გამოქვეყნებული მონაცემების მიხედვით, უწყება 164 ერთეული ჰიბრიდული ავტომობილის შეძენას გეგმავს. შესყიდვის სავარაუდო ღირებულება 10 159 800 ლარს შეადგენს.

დოკუმენტაციის თანახმად, ავტოსატრანსპორტო საშუალებების მიწოდება ხელშეკრულების გაფორმებიდან 240 კალენდარული დღის განმავლობაში უნდა განხორციელდეს.

რაც შეეხება ტექნიკურ მახასიათებლებს, შემოთავაზებული ავტომობილები უნდა აკმაყოფილებდეს შემდეგ კრიტერიუმებს:

• უნდა იყოს ახალი, არაუადრეს 2026 წლის გამოშვების;

• მარცხენასაჭიანი და ექსპლუატაციაში არმყოფი (გარბენი არაუმეტეს 200 კმ);

• ნივთობრივად და უფლებრივად უნაკლო და განბაჟებული;

• მიმწოდებელმა საკუთარი ხარჯებით უნდა უზრუნველყოს ავტომანქანების შემსყიდველზე გადაფორმება.

მსურველებისთვის სატენდერო წინადადებების მიღება 1-ელ ივლისს დაიწყება და 2 ივლისს დასრულდება.

ცნობისთვის, „ცენტრალურმა შემსყიდველმა ორგანომ“ ავტომობილების შესაძენად მსხვილი ტენდერი 22 ივნისსაც გამოაცხადა. აღნიშნული დოკუმენტაციის მიხედვით, უწყება 47.3 მილიონ ლარად 595 ახალი, 2026 წელს გამოშვებული ავტომობილის ყიდვას გეგმავდა.