"ოცნება" რუსეთის მსგავსი რეპრესიებით მომიტინგეებს, უფლებადამცველებს და მედიას თავს ესხმის“ - Associated Press

 
საქართველოს მთავრობა რუსეთის მსგავსი რეპრესიებით მომიტინგეებს, უფლებადამცველებს და მედიას თავს ესხმის - ამ სათაურით აქვეყნებს სტატიას Associated Press.

გავლენიანი გამოცემა წერს, რომ საქართველოს მთავრობა საპროტესტო აქციების წინააღმდეგ დაკავებებს, მაღალ ჯარიმებს და სხვა მკაცრ ზომებს იყენებს, თუმცა ამის მიუხედავად, საპროტესტო აქციები მაინც გრძელდება.

Associated Press-ი წერს, რომ შაბათ-კვირას ადგილობრივი არჩევნების პარალელურად კიდევ მეტი საპროტესტო აქცია იგეგმება.

„3.7 მილიონი მოსახლეობის მქონე სამხრეთ კავკასიურ ქვეყანაში რეპრესიების შედარებას აკეთებენ საქართველოს გავლენიან მეზობელთან და ყოფილ იმპერიულ მმართველ რუსეთთან, სადაც პრეზიდენტი ვლადიმერ პუტინი ახშობს განსხვავებულ აზრს. „ქართულ ოცნებას“ ქვეყნის მოსკოვის გავლენის ორბიტისკენ წაყვანაში ადანაშაულებენ“, - აღნიშნულია სტატიაში.
გამოცემა წერს, რომ ძირითადად მშვიდობიანი საპროტესტო აქციების ძალადობრივი დარბევა 2024 წლის ნოემბრის ბოლოს გამწვავდა, როდესაც ორ კვირაში 400-ზე მეტი ადამიანი დააკავეს; Amnesty International-ის ცნობით, სულ მცირე 300-მა განაცხადა სასტიკი ცემისა და სხვა არასათანადო მოპყრობის შესახებ. ჯგუფის განცხადებით, სისასტიკის დიდი ნაწილი დაკავების ადგილებში ხდება.

Associated Press-ი წერს, რომ კორუფციის წინააღმდეგ მებრძოლი ორგანიზაციის, Transparency International Georgia-ს, თანახმად, 2024 წლის აპრილიდან 2025 წლის აგვისტომდე, საპროტესტო აქციებზე სულ მცირე 76 ადამიანი სისხლის სამართლის პასუხისგებაში მიეცა, ხოლო 60-ზე მეტი დააპატიმრეს.

სტატიაში ასევე საუბარია დაკავებულ ოპოზიციონერ ლიდერებზე და "ოცნების" მცდელობაზე, ჩაახშოს თავისუფალი ხმა.

„სისხლისსამართლებრივი დევნის შემთხვევები, სავარაუდოდ, ახლა უფრო მაღალია და კიდევ უფრო მეტ ადამიანს დაეკისრა მაღალი ჯარიმები. ხელისუფლებამ ასევე მიზანში ამოიღო ოპოზიციური პოლიტიკოსები და პარტიები, ასევე უფლებადამცველები და მედია. ზაფხულში, ოპოზიციის რვა ლიდერი დააპატიმრეს საპარლამენტო გამოძიებასთან თანამშრომლობაზე უარის თქმის ბრალდებით, ხოლო კიდევ ორი მოგვიანებით სხვადასხვა ბრალდებით დააკავეს. ოპოზიციამ განაცხადა, რომ ეს დაპატიმრებები პოლიტიკურად მოტივირებული იყო. აგვისტოში ხელისუფლებამ შვიდი უფლებადამცველი ჯგუფის საბანკო ანგარიშები გაყინა. პროკურატურა ამტკიცებდა, რომ ისინი დემონსტრანტებს ამარაგებდნენ აღჭურვილობით, როგორიცაა ნიღბები, წიწაკის სპრეი და დამცავი სათვალე, რომლებიც პოლიციასთან შეტაკებების დროს გამოიყენებოდა“, - წერს გამოცემა.