"ოცნება"კვლავაც რუსულ ინტერესებს ატარებს, გავრილოვის სისხლიანი ღამის გამო ხელისუფლება უნდა წავიდეს მმართველობიდან" - ალექსანდრე არჩვაძე

ანტისაოკუპაციო აქცია გუშინ ხელისუფლებამ ძალის გამოყენებით დაარბია. "ნიუპოსტი" აქციის ერთ-ერთ მონაწილეს ესაუბრა, რომელიც მოვლენების უშუალო თვითმხილველი იყო. 27 წლის ალექსანდრე არჩვაძე, რომელიც "ეროვნულ-დემოკრატიული პარტიის" ახალგაზრდული ფრთის წევრია, ამბობს, რომ საქართველოს ხელისუფლება გაუსწორდა საკუთარ მოქალაქეებს იმის გამო, რომ ისინი ოკუპანტი სახელმწიფოს წარმომადგენლის პარლამენტში მისვლას აპროტესტებდნენ.

"დღეს, როცა საქართველოს ტერიტორიები ოკუპირებულია რუსეთის მიერ, როცა უკვე ტითქმის სამასი წელია ქართველი ხალხი იბრძვის რუსეთის იმპერიალისტური პოლიტიკის წინააღმდეგ, დღეს 21-ე საუკუნეში, ჩვენი ხელისუფლება კვლავაც რუსულ ინტერესებს ატარებს. ჩვენი ქვეყნის მომავალი ევროპაშია, ჩვენ უნდა დავბრუნდეტ ევროპაში, რომელიც ჩვენი ბუნებრივი მდგომარეობა იყო და რომელსაც სწორედ რუსეთმა მოგვწვიტა. "ქართული ოცნება" ჩვენ, ახალგაზრდებს და საქართველოს მოქალაქეებს ხელკეტებითა და ცრემლსადენი გაზით დაგვიპირისპირდა, უფრო მეტიც, მათ გამოიყენეს ისეთი ტყვიები, რომლითაც ადამიანებმა ფიზიკური დაზიანებები მიიღეს. გავრილოვის სისხლიანი ღამის გამო ხელისუფლება უნდა წავიდეს მმართველობიდან. მე ვიყავი მოვლენების ეპიცენტრში და საკუთარი თვალით ვხედავდი, როგორ დაუნდობლად გვისწორდებოდნენ და დამიზნებით ისროდნენ ტყვიებს" - აცხადებს ალექსანდრე არჩვაძე.

"ოცნების" ხელისუფლებამ მშვიდობიანი, ანტისაოკუპაციო აქცია ყოველგვარი გაფრთხილების გარეშე დაარბია. რუსთაველის გამზირზე შეკრებილ მოქალაქეებს ცხოველებისთვის განკუთვნილი ტყვიები ესროლეს და ცრემლსადენი გაზის კვამლში გაახვიეს. არ დაივიწყეს არც წყლის ჭავლის გამოყენება.

პროტესტი და საზოგადოების აღშფოთება კი საქართველოში რუსული დელეგაციის შემოშვებას, რუსი კომუნისტი დეპუტატის, სერგეი გავრილოვის პარლამენტის თავმჯდომარის სავარძელში ჩაჯდომასა და მისთვის წითელი ხალიჩის დაგებას მოჰყვა.