„პროკურატურა ვალდებულია, მოკვლევა დაიწყოს“ - ირმა ინაშვილი ირაკლი ღარიბაშვილის წერილს ეხმაურება და ექსპრემიერისთვის განსაკუთრებული დაცვის დაწესებას ითხოვს

ექსპრემიერ ირაკლი ღარიბაშვილის მიერ ციხიდან გავრცელებულ მორიგ წერილს, სადაც საუბარია კობახიძე-მდინარაძის მმართველობის პერიოდში შესაძლო თვითმკვლელობით შენიღბულ მკვლელობებზე, „პატრიოტთა ალიანსის“ ლიდერი ირმა ინაშვილი ეხმაურება.

ინაშვილის განცხადებით, უფლებადამცველ ლაზარე ჯორბენაძის გარდაცვალების ფაქტი თავიდანვე ბადებდა ეჭვებს, ხოლო ღარიბაშვილის მიერ დასმულ კითხვებზე პროკურატურამ უშუალო რეაგირება უნდა მოახდინოს.

„პატრიოტთა ალიანსის“ ლიდერის განცხადებას უცვლელად გთავაზობთ:

„რამდენადაც ჩემთვის ცნობილია, ლაზარე ჯორბენაძე აღმსარებელი და მაზიარებელი კაცი იყო და მისი თვითმკვლელობა იმთავითვე ეჭვს იწვევდა და უამრავ კითხვას ბადებდა.

ღარიბაშვილის წერილი ცხადყოფს, რომ ნებისმიერი კრიტიკა - ჩვენს შემთხვევაში კი სრულიად საფუძვლიანი კრიტიკა — მტრობის რანგში იყო აყვანილი მდინარაძე-კობახიძის გუნდის მიერ, რომელიც საკუთარი უცოდინარობის და უვარგისობის გამოსწორებას კი არ ცდილობდა, არსებული პრობლემების სხვებზე გადაბრალებით იყო დაკავებული.

მაგრამ სხვებზე გადაბრალება აქ უკვე ყველაზე ნაკლები პრობლემაა. ახლა საჯაროდ დაისმება კითხვები როგორც უსაფუძვლოდ დაპატიმრებული ადამიანების შესახებ, ისე - რაც უარესია - ადამიანების თვითმკვლელობებთან დაკავშირებით.

პირველი კითხვა უკვე დასმულია: ის ექსპრემიერმა ირაკლი ღარიბაშვილმა დასვა და ეს კითხვა ლაზარე ჯორბენაძის თვითმკვლელობას ეხება. თუმცა, მე არ გამოვრიცხავ თვითმკვლელობის იმიტაციასაც კი, რადგან უკვე ვთქვი, რომ ეს კაცი აღმსარებელი და მაზიარებელი იყო, რაც თვითმკვლელობას ეჭვქვეშ აყენებს.

ვფიქრობ, პროკურატურა ვალდებულია, დაიწყოს მოკვლევა აღნიშნულ საკითხებთან დაკავშირებით.

ამავდროულად, სრულიად ბუნებრივად მიჩნდება განცდა, რომ ღარიბაშვილის სიცოცხლე ახლა უკვე საფრთხეშია. ამიტომ საჯაროდ მივმართავ შესაბამისი კომპეტენციის ორგანოებს - განსაკუთრებული დაცვის რეჟიმი აამოქმედონ ირაკლი ღარიბაშვილის მიმართ“, - აცხადებს ირმა ინაშვილი.