„პროპუტინისტური ხელისუფლების პირობებში პრემიერები ისე ქრებიან, რომ თავადაც არ იციან“ - გიორგი მარგველაშვილი

"ჩვენ ვცხოვრობთ მმართველობის პერიოდში, როდესაც პრემიერები ისე ქრებიან, მიდიან და მოდიან, რომ თავადაც არ იციან"- ამის შესახებ საქართველოს ყოფილმა პრეზიდენტმა, გიორგი მარგველაშვილმა "ტვ პირველთან" განაცხადა. 

"ძლიერი საქართველოს" ლიდერი "ქართული ოცნების" მმართველობის 12 წელს აფასებს და ამბობს, რომ "ქართული ოცნება" მხოლოდ შიშზე, დაპირისპირებაზე, სახელების დარქმევაზე წარმოებული პოლიტიკას ატარებს.

მისივე თქმით, ივანიშვილის გუნდი საარჩევნო კამპანიას პრორუსული, ანტიდასავლური გეზით ატარებს.

ამასთან, გიორგი მარგველაშვილი აღნიშნავს, რომ "ოცნებას" რეიტინგი საერთოდ არ აქვს, რადგან საზოგადოების განწყობა ივანიშვილის გუნდის განწყობისგან რადიკალურად განსხვავებულია.

როდის იცოდა პრემიერმა იქნება თუ არა პრემიერი, ან როდის იცოდა, რომ არ იქნება?! ჩვენ ვცხოვრობთ მმართველობის პერიოდში, როდესაც პრემიერები ისე ქრებიან, მიდიან, მოდიან, რომ თავადაც არ იციან.  ამაში არაფერი არაორდინალური არ არის. ბოლო 11 წელიწადი მე არ მესმის, რას აკეთებენ ისინი.

ჩვენ მოვდიოდით დიდი იმედით, რომ არამარტო იმ პრობლემებს, რომლებიც წინა ხელისუფლებას ჰქონდა, იმას გამოვასწორებდით, არამედ ვიქნებოდით ძალიან სოციალურად ორიენტირებული მთავრობა.

შემდეგ დაიწყო მხოლოდ შიშზე, დაპირისპირებაზე, სახელების დარქმევაზე წარმოებული პოლიტიკა. გზა არ მომწონს როგორც არის დაგებული, შენ ხარ ნაცი. საარჩევნო კამპანია წარიმართება პრორუსული, ანტიდასავლური გეზით.

ძალიან რთულია, 85%-ს მოსახლეობისას სხვანაირად უნდოდეს და შენ ეუბნებოდე, რომ არა, შეიცვალე აზრი. ასე, რომ ბუნებრივია ჩემთვის რეიტინგის არარსებობა.

ბუნებრივი იყო 2020 წელსაც, როდესაც მათ, ფაქტობრივად, მოიპარეს არჩევნები. მაშინაც მესმოდა, რომ რეიტინგი არ ჰქონდათ. ჩვენ თუ არ გავუშვით პრორუსული, პროპუტინისტური ხელისუფლება ისტორიის იმ ნაწილში, რომელიც მათ აირჩიეს, ანუ, წარსულში, ჩვენ თავადვე წავალთ წარსულისკენ", - ამბობს გიორგი მარგველაშვილი.ირაკლი კობახიძემ არ იცის, იქნება თუ არა ისევ პრემიერი. საკითხზე "პირველების" დასმულ კითხვას ირაკლი კობახიძე პირდაპირ ვერ პასუხობს და ამბობს, რომ გადაწყვეტილება პარტიის საპატიო თავმჯდომარემ უნდა მიიღოს.