პუტინზე, უკრაინასა და საქართველოზე გაკეთებული სკანდალური განცხადების შემდეგ, გერმანელი ვიცე-ადმირალი გადადგა

გერმანიის საზღვაო ძალების სარდალი, ვიცე-ადმირალი კაი-ახიმ შიონბახი პუტინზე, უკრაინასა და საქართველოზე გაკეთებული განცხადების შემდეგ თანამდებობიდან გადადგა. 

გადადგომამდე მან ბოდიში მოიხადა და განმარტა, რომ ინდოეთში, თავდაცვითი კვლევების ინსტიტუტში გამართულ კონფერენციაზე გამოთქმული მოსაზრება არ გამოხატავდა გერმანიის თავდაცვის უწყების აზრს. განმარტების გაკეთება შიონბახს გერმანიის თავდაცვის უწყებამ მას შემდეგ მოსთხოვა, რაც უკრაინის საგარეო საქმეთა სამინისტრომ მოუწოდა ბერლინს, სარდლის განცხადებების საჯარო უარყოფისკენ:

„მე ვთხოვე თავდაცვის მინისტრს ქრისტინე ლამბრეხტს, გავეთავისუფლებინე ჩემი მოვალეობებისგან დაუყოვნებლივ. ჩემ მიერ უსაფრთხოებისა და სამხედრო პოლიტიკის შესახებ ინდოეთში გაკეთებული დაუფიქრებელი განცხადებები სულ უფრო მეტ ტვირთად აწვება ჩემს თანამდებობას. გერმანიის სამხედრო-საზღვარო ძალებს, ბუნდესვერს და, უპირველეს ყოვლისა, გერმანიის ფედერაციულ რესპუბლიკას მეტი ზიანი რომ ავაცილო თავიდან, ეს ნაბიჯი აუცილებლად მიმაჩნია,“ - თქვა შიონბახმა.

ინდოეთში ვიზიტისას, პრესკონფერენციაზე შიონბახმა განაცხადა, რომ პუტინი პატივისცემას იმსახურებს, რაც შეეხება ნატოს ალიანსში უკრაინასა და საქართველოს გაწევრიანებას, შიონბახმა აღნიშნა, რომ უკრაინა გაწევრიანებისთვის საჭირო კრიტერიუმებს ვერ აკმაყოფილებს, ხოლო საქართველო აკმაყოფილებს, თუმცა ეს მიზანშეწონილი არ იქნება.

,,ადვილია ის პატივისცემა მივცეთ, რომელსაც ითხოვს და რომელსაც, სავარაუდოდ, მართლაც იმსახურებს“ - აღნიშნა სარდალმა და დასძინა, რომ რუსეთი ძველი და მნიშვნელოვანი ქვეყანაა.

გერმანიის მთავრობამ აღნიშნულთან დაკავშირებით განცხადება გაავრცელა. მათი თქმით, ისინი საზღვაო ძალების ვიცე-ადმირალის განცხადებას არ ეთანხმებიან. თავდაცვის სამინისტროს მიერ გავრცელებული ინფორმაციით, კაია ახიმის მიერ გაკეთებული განცხადება თავდაცვის სამინისტროს პოზიციას არ გამოხატავს.