„რა არის ეს ვიზალიბერალიზაცია, ბოლოს და ბოლოს?! 90 დღით მიდიხარ უცხოეთში ისე, რომ საელჩოში რიგში დგომა არ გიწევს - ამას გვაყვედრიან?“ - ირაკლი ქადაგიშვილი

რა არის ეს ვიზალიბერალიზაცია ბოლოს და ბოლოს! 90 დღით მიდიხარ უცხოეთში ისე, რომ საელჩოში რიგში დგომა არ გიწევს - ამას გვაყვედრიან ქართველ ხალხს, რომელმაც ევროპისათვის და ნატოსთვის ამხელა ბრძოლა გასწია?! მთელ ნატოში საუკეთესო კონტინგენტები გვყავდა და ერთი თოფი არ უჩუქებიათ საქართველოსთვის, - ამის შესახებ "ქართული ოცნების" დეპუტატმა, ირაკლი ქადაგიშვილმა ჟურნალისტებთან განაცხადა.

მისი თქმით, „ახლა უნდა დაველოდოთ, როგორ წაართმევენ ქართველ ხალხს ვიზალიბერალიზაციას".

„მათი შეფასებები მიუღებელი გახდა მას შემდეგ, რაც 2024 წლის არჩევნებში წააგეს. მის მერე ისინი არიან საქართველოსთან შურისძიების პოზიციაში გადმოსულები. ხომ გახსოვთ, როგორ მოგვანიჭეს ჩვენ ვიზალიბერალიზაცია?! უბრალოდ სხვა შანსი არ ჰქონდათ. მაშინ ასე კი არ თქვეს, რომ საქართველოს მთავრობის დამსახურებაა, რომ რეფორმები გაატარა, არამედ თქვეს, რომ ჩვენ საქართველოს მთავრობას კი არა ქართველ ხალხს ვანიჭებთო, ამიტომ ახლა დაველოდოთ, როგორ წაართმევენ ქართველ ხალხს ვიზალიბერალიზაციას“, - აღნიშნა ქადაგიშვილმა.

კითხვაზე, იქნება თუ არა ვიზალიბერალიზაციის დაკარგვა ხელისუფლების პასუხისმგებლობა, ქადაგიშვილი პასუხობს რომ „არა".

„ჩვენი პასუხისმგებლობა არ იქნება და რატომ - იმიტომ რომ არ შეიძლება შენ იყო პასუხისმგებელი იმაზე, რატომ ჩაატარე გამჭვირვალე, დემოკრატიული არჩევნები და რატომ გაიმარჯვე. არ შეიძლება შენ პასუხისმგებელი იყო გამჭვირვალობაზე, რაც ევროპაში, მაგალითად, ყველგან მიღებულია რომ დაფინანსება იყოს გამჭვირვალე. არ შეიძლება სახელმწიფოს დააკისრო პასუხისმგებლობა იმაზე, რომ თავის ვალდებულებას ასრულებს და ათასგვარი რევოლუციური სცენარს არ აძლევს გასაქანს. ეს არ არის პასუხისმგებლობა. ეს არის სახელმწიფოს ვალდებულება. არ შეიძლება პასუხისმგებლობა დააკისრო შენ სახელმწიფოს იმაზე, რომ შენ შეგიძლია ყოველგვარი ბიუროკრატიული ბარიერების გარეშე მაუწყებლობა დააფუძნო. არ შეგიძლია პასუხისმგებლობა დააკისრო სახელმწიფოს იმაზე, რომ ამ სახელმწიფოს არც ერთი სატელევიზიო არხი არ აუკრძალია, არ მიუთვისებია და პირიქით, მიმტაცებლებს ჩამოართვა და კანონიერ მფლობელებს დაუბრუნა სასამართლოს გზით“, - განაცხადა ქადაგიშვილმა.

ამასთან, კითხვაზე, „ქართველმა ხალხმა ვის მოსთხოვოს პასუხი“, უმრავლესობის დეპუტატი პასუხობს, რომ „ქართველი ხალხი პასუხს მოსთხოვს იმას, ვინც იქნება საქართველოში დემოკრატიაზე ასეთი ორკესტრირებულო შეტევის ავტორი“.

„ჰგონიათ, რომ ქართველი ხალხი და საქართველო არის ყველაზე დაბალი ღობე, რომელსაც ყველაფერი შეიძლება აკადრო და გაუვიდეს. რა არის ეს ვიზალიბერალიზაცია ბოლოს და ბოლოს?! 90 დღით მიდიხარ უცხოეთში ისე, რომ საელჩოში რიგში დგომა არ გიწევს. და ამას გვაყვედრიან?! ამას აყვედრიან ქართველ ხალხს?! ქართველ ხალხს, რომელმაც ევროპისათვის და ნატოსთვის ამხელა ბრძოლა და შრომა გასწია და კიდევ იმას გვიკიჟინებდნენ, რეზოლუციაში ჩაგვიწერეს, რუსეთის წინააღმდეგ სანქციები რატომ არ მიიღეთო და ვინ იყო ჩვენი დამცველი?! მთელ ნატოში საუკეთესო კონტინგენტები გვყავდა და ერთი თოფი არ უჩუქებიათ საქართველოსთვის“, - განაცხადა ქადაგიშვილმა.

კიდევ ერთ კითხვაზე, „დიდი არაფერია ვიზალიბერალიზაცია?", ქადაგიშვილი ასე პასუხობს: დიდი იცი რა არის?! დიდი არის საქართველო, საქართველოს გადარჩენა, ამ ქვეყანაში მშვიდობა და არა ის, რომ საქართველო იყოს მარიონეტი ქვეყანა, რომელსაც გამოიყენებენ ისე, რომ ვიზალიბერალიზაცია კი არა ბომბების წვიმას რომ ნატრულობდნენ აქ, ის გახდება მერე თავში სახლელი”.

„ეს არის მთავარი საქართველოსთვის და ნუ გეშინიათ თქვენ, ვიზალიბერალიზაცია არ არის ის თემა, რომელსაც ასე ადვილად მოკიდებენ ხელს, იმიტომ რომ მათ ქართველ ხალხს მიანიჭეს ვიზალიბერალიზაცია და ახლა უნდა დასაჯონ საქართველოს ხალხი. არ აპირებენ და ამიტომ ვერც დააპირებენ. იმიტომ რომ ჩვენ ვართ მართლები. საქართველო არის მართალი. ეს ქვეყანა არ არის ჩალით გადახურული," - განაცხადა ქადაგიშვილმა.