რა წერია საქართველოზე - ევროკომისიის გაფართოების ანგარიში გამოქვეყნდა

ევროკომისიის მიერ 2025 წლის გაფართოების ანგარიში გამოქვეყნებულია - დოკუმენტის თანახმად, საქართველოს ევროკავშირში გაწევრიანების გზაზე პროგრესი არ აქვს და კანდიდატის სტატუსისგან მხოლოდ სახელი დარჩა.

ხელისუფლების მოქმედებები ვერ პასუხობს იმ მოლოდინებს, რაც ევროკავშირს აქვს კანდიდატი ქვეყნის მიმართ. დაფიქსირდა სერიოზული უკუსვლა ძირითად მიმართულებებში, მიღებულ იქნა რეპრესიული კანონმდებლობა, რომელიც ზღუდავს ფუნდამენტურ უფლებებსა და თავისუფლებებს; მოხდა სასამართლო სისტემის პოლიტიკური ინსტრუმენტალიზაცია; ადგილი აქვს ოპოზიციის ლიდერების დევნას, დემონსტრანტებისა და ჟურნალისტების თვითნებური დაკავებას და სამოქალაქო სივრცის შევიწროებას. კონტროლისა და ბალანსების მექანიზმების და დემოკრატიული გადაწყვეტილებების მიღების პრინციპის ეროზიამ, პარლამენტის ეფექტური ზედამხედველობის არარსებობასთან ერთად, გამოიწვია აღმასრულებელი ხელისუფლების გაძლიერება, მათ შორის სახელმწიფო ინსტიტუტების მიტაცება.

2024 წლის ნოემბერში საქართველოს ხელისუფლების გადაწყვეტილებამ, არ გაეგრძელებინა ევროკავშირთან გაწევრიანების მოლაპარაკებების დაწყება - ცალსახად დაადასტურა მათი დაშორება წინა მთავრობების პოლიტიკისგან, საქართველოს მოსახლეობის უდიდესი ნაწილის ევროპული მისწრაფებებისგან და საქართველოს კონსტიტუციაში ჩამოწერილი ვალდებულებისგან, უზრუნველყოს ქვეყნის სრული ინტეგრაცია ევროკავშირში“, ვნითხულობთ ანგარიშში.
ანგარიშში მოხვდა, ის ანტიერევოპულ დეზინფორმაცია, რომელსაც "ქართული ოცნება" ახორციელებდა.

ევროკომისია თვლის, რომ ივანიშვილის გუნდს არ გამოუჩენია არანაირი პოლიტიკური ნება, განეხორციელებინა შესაბამისი რეფორმები.

საქართველოს ხელისუფლების ამგვარმა ქცევამ დააზიანა ევროკავშირი-საქართველოს ურთიერთობები და ქვეყანა კიდევ უფრო დააშორა გაფართოების პროცესს. შედეგად, საქართველოს ევროკავშირში გაწევრიანების პროცესი ფაქტობრივად შეჩერებულია. სანამ საქართველოს ხელისუფლება არ შეცვლის ამ კურსს, კომისია, საბჭოსთან შეთანხმებით, ამცირებს მაღალი დონის პოლიტიკურ კონტაქტებს, აჩერებს ორმხრივ დახმარებას, რომელიც პირდაპირ სარგებელს აძლევდა საქართველოს ხელისუფლებას, და აძლიერებს მხარდაჭერას სამოქალაქო საზოგადოებისადმი და დამოუკიდებელი მედიისადმი.

2025 წლის იანვარში, კომისიის წინადადების საფუძველზე, საბჭომ მიიღო გადაწყვეტილება ევროკავშირი-საქართველოს ვიზების გამარტივების შეთანხმების ნაწილობრივი შეჩერებისა და დიპლომატიური და სამსახურებრივი/ოფიციალური პასპორტების მფლობელთათვის ვიზისგან გათავისუფლების შეჩერების შესახებ.

საქართველომ დაუყოვნებლივ უნდა შეაჩეროს დემოკრატიული უკუსვლა და გადადგას ყოვლისმომცველი და პრაქტიკული ნაბიჯები არსებული პრობლემების მოსაგვარებლად და ძირითადი რეფორმების გასატარებლად.

გათვალისწინებით 2024 წლის დეკემბრის ევროპული საბჭოს დასკვნებისა, რომლის მიხედვითაც საქართველოს მთავრობის მოქმედებებმა ფაქტობრივად შეაჩერა წინასწარი გაწევრიანების პროცესი, და იმის ფონზე, რომ ქვეყანაში მას შემდეგაც გრძელდება ძირითადი მიმართულებებით უკუსვლა, კომისია მიიჩნევს, რომ საქართველო მხოლოდ სახელით არის კანდიდატი ქვეყანა. საქართველოს ხელისუფლებამ უნდა აჩვენოს მტკიცე პოლიტიკური ნება კურსის შესაცვლელად და ევროკავშირში გაწევრიანების გზაზე დასაბრუნებლად“, - წერია ანგარიშში.