„საბჭოთა სტანდარტების დონემდეა დასული ევროპული ბიუროკრატიის საქმიანობა“ - კობახიძე ევროკავშირის გაფართოების ანგარიშზე

„ძალიან დასანანია, როდესაც ჩვენ ვხედავთ ამ მასშტაბის უსამართლობას და ფაქტების დამახინჯებას ევროპული ბიუროკრატიის მხრიდან. ევროპული ბიუროკრატია წარმოადგენს ევროკავშირს და ასეთ დროს საფრთხე ექმნება და ზიანი ადგება არა მხოლოდ ევროპული ბიუროკრატიის რეპუტაციას, არამედ ევროკავშირის რეპუტაციასაც. სწორედ ასეთი ქმედებების შედეგია ის, რომ საქართველოში თანდათანობით მცირდება ნდობა, როგორც ევროპული ბიუროკრატიის, ისე, ზოგადად ევროკავშირის მიმართ. ჩვენ ძალიან დიდი იმედი გვაქვს, რომ ეს ვითარება შეიცვლება ევროკავშირში და სამართლიანობა იქნება ის პრინციპი, მომავალში რითაც იხელმძღვანელებენ ევროპული ბიუროკრატიის წარმომადგენლები. თუმცა, დღეს ეს ასე არ არის და ამისი საუკეთესო გამოხატულებაა ის ანგარიში, რომელიც გამოქვეყნდა. იგივე, როცა საუბარია რუსეთისთვის დაწესებულ სანქციებზე, და ამასთან დაკავშირებით უკრაინის მიერ გამოხატულ შფოთვაზე, ჩვენ არ გვახსენდება უკრაინის შეშფოთებული პოზიცია მოლდოვასთან, ან სხვა კანდიდატ ქვეყნებთან მიმართებით, რომელიც ასევე არ მიუერთდა სანქციებს. ეს ყველაფერი ნიშნავს ორმაგ სტანდარტებს, ნიშნავს უსამართლობას, ნიშნავს იმას, რომ სერიოზული პრობლემებია ევროპულ ბიუროკრატიაში. კიდევ ერთხელ გავიმეორებ, რომ ჩვენ გვაქვს განსხვავებული მოლოდინი იმასთან დაკავშირებით, რომ საბოლოოდ ეს ყველაფერი შეიცვლება. ჩვენ გვსურს 2030 წლისთვის გავხდეთ ევროკავშირის წევრი ქვეყანა და იმედი მაქვს, მანამდე რადიკალურად შეიცვლება მდგომარეობა ევროკავშირში. დღეს საბჭოთა სტანდარტების დონემდეა დასული ევროპული ბიუროკრატიის საქმიანობა, რაც ძალიან დასანანი და სამწუხაროა“, - განაცხადა ჩინეთში მყოფმა კობახიძემ ევროკავშირის გაფართოების ანგარიშის შეფასებისას.  "ევროკომისია საქართველოს კანდიდატ ქვეყნად მხოლოდ ფორმალურად განიხილავს... საქართველოში, სერიოზული დემოკრატიული უკუსვლით, სიტუაცია მკვეთრად გაუარესდა. აქამდე არასდროს, გაფართოების შესახებ არც ერთ მოხსენებაში, ასეთი მასშტაბის დემოკრატიულ უკუსვლაზე საუბარი არ ყოფილა. ჩვენ ვნახეთ კანონის უზენაესობის მკვეთრი ეროზია და ფუნდამენტური უფლებების სერიოზული შეზღუდვები. საქართველოს მთავრობის წარმომადგენლებმა დაუყოვნებლივ უნდა შეცვალონ მათი კურსი, რადგან საქართველოს მოსახლეობა ითხოვს ევროპულ მომავალს და მათ ჩვენ მხარს ვუჭერთ. კანდიდატის სტატუსი საქართველოსთვის მხოლოდ ფურცელზე არსებობს" | განაცხადა გაფართოების საკითხებში ევროკომისარმა, მარტა კოსმა