წმინდა ქეთევან დედოფალზე გაკეთებული განცხადებების გამო საქართველოს საგარეო საქმეთა სამინისტროში ირანის ელჩი დაიბარეს

საქართველოს საგარეო საქმეთა სამინისტრომ ირანის ისლამური რესპუბლიკის საგანგებო და სრულუფლებიანი ელჩი, სეიედ ალი მოჯანი, სოციალურ ქსელში წმინდა ქეთევან დედოფალთან დაკავშირებით გავრცელებული განცხადებების გამო დაიბარა.

საგარეო საქმეთა მინისტრის მოადგილემ, ალექსანდრე ხვთისიაშვილმა, ირანელ დიპლომატს განუმარტა, რომ მისი საჯარო პოზიციონირება სცდება დიპლომატიური საქმიანობის ფარგლებს და უარყოფითად მოქმედებს საზოგადოებრივ განწყობებზე.

საგარეო საქმეთა სამინისტროს წარმომადგენელმა ხაზგასმით აღნიშნა, რომ საქართველოში აკრედიტებულმა დიპლომატებმა თავიანთი საქმიანობა საერთაშორისო ნორმებისა და დიპლომატიური მანდატის შესაბამისად უნდა წარმართონ:

დიპლომატიურმა წარმომადგენლებმა პატივი უნდა სცენ დამკვიდრებულ წესებს და თავი შეიკავონ მასპინძელი ქვეყნის ისტორიისა თუ შიდა საკითხების საკუთარი ინტერპრეტირებისგან.

ქართულმა მხარემ იმედი გამოთქვა, რომ ირანის ოფიციალური უწყებები შესაბამის ზომებს მიიღებენ, რათა მსგავსი შემთხვევები აღარ განმეორდეს და საქართველოს მხრიდან დამატებითი ზომების მიღება არ გახდეს საჭირო.

ირანის ელჩმა სოციალურ ქსელში გამოაქვეყნა ინფორმაცია, რომლის თანახმადაც თბილისში ირანის საელჩოს ფასადი ქეთევან დედოფლის გამოსახულებით განათდა. ამასთან, ალი მოუჯანმა დააანონსა პირადად ჩატარებული კვლევის გამოქვეყნება, სადაც იგი ქეთევან წამებულის შესახებ არსებული ისტორიული წყაროებისა და დოკუმენტების საკუთარ ხედვას შესთავაზებს საზოგადოებას.

„ჩემთვის ეს გამოსახულება იმ ისტორიული მეხსიერების სიმბოლოა, რომლის შესახებ დღემდე არაერთი განსხვავებული ისტორია არსებობს. მალე გავუზიარებ მკითხველს ჩემ მიერ ჩატარებული პირველადი კვლევის შედეგებს. ეს არ იქნება ოფიციალური ვერსია, არამედ ისტორიკოსის პირადი ხედვა. შესაძლოა, მსგავსი ისტორიების ხელახალი გააზრება დღეს ერთმანეთის უკეთ და ღრმად გაცნობის საშუალება იყოს“, — დაწერა ირანის ელჩმა.

ელჩის აღნიშნულმა განცხადებებმა ქართულ საზოგადოებაში, საპარლამენტო უმრავლესობასა და საპატრიარქოში მკვეთრად უარყოფითი რეაქცია და კრიტიკა გამოიწვია.