„თუ მოვლენები ასე გაგრძელდა, ველით, რომ EBRD, ADB შეაჩერებენ დაფინანსებას, რომელსაც მთავრობისთვის სარგებელი უნდა მოეტანა“ - Bankwatch Network

ცენტრალურ და აღმოსავლეთ ევროპის ბანკებზე დამკვირვებელთა ქსელის (CEE Bankwatch Network) დირექტორი, განცხადებას ავრცელებს საქართველოში, ყირგიზეთსა და EBRD-ის ოპერირების სხვა ქვეყნებში სამოქალაქო საზოგადოებისთვის სივრცის შემცირებაზე.

13 მაისს გამოქვეყნებულ განცხადებაში ნათქვამია, რომ ბოლო წლებში Bankwatch-მა ატეხა განგაში სამოქალაქო საზოგადოების სივრცის გაუარესების შესახებ ცენტრალური და აღმოსავლეთ ევროპის, კავკასიისა და ცენტრალური აზიის ქვეყნებში, რათა გააფრთხიოს საერთაშორისო ფინანსური ინსტიტუეტები, რომელთა მონიტორინგსაც ახორციელებენ.

განცხადებაში საუბარია ყირგიზეთში მიღებულ "უცხოური გავლენის" კანონპროექტზე და მისი მსგავსი კანონმდებლობის საქართველოს პარლამენტში განხილვაზე. (განცხადების გამოქვეყნების დროს რუსული კანონი ჯერ საბოლოოდ დამტკიცებული არ იყო).

"ქართული საზოგადოების მასობრივი პროტესტის საპასუხოდ მთავრობა რეპრესიულ მიდგომას ატარებს, რასაც Bankwatch-ის თანამშრომლების, ადგილზე ჩვენი ჯგუფის წევრებისა და საქართველოს სამოქალაქო საზოგადოების სხვა პარტნიორების შევიწროება და დაშინება მოსდევს.

ჩვენ ვაფასებთ ევროპის რეკონსტრუქციისა და განვითარების ბანკის (EBRD) პრეზიდენტ ოდილ რენო-ბასოს მიერ გაკეთებულ განცხადებებს, რომელიც გამოხატავს შეშფოთებას საქართველოში შექმნილი ვითარების გამო. თუმცა, თუ მოვლენები კვლავაც ასე გაგრძელდა, ჩვენ ველით, რომ ევროპის რეკონსტრუქციისა და განვითარების ბანკი სხვა საერთაშორისო ფინანსურ ინსტიტუტებთან ერთად, როგორებიცაა აზიის განვითარების ბანკი და მსოფლიო ბანკის ჯგუფი, ისევე როგორც ორმხრივი სააგენტოები, გააძლიერებენ ზეწოლას და შეაჩერებენ საჯარო სექტორის ნებისმიერი დაფინანსებას, რომელიც სარგებელს მოუტანს მთავრობას, ისევე როგორც ნებისმიერი კერძო კომპანიების დაფინანსებას, რომლებიც დაკავშირებულნი არიან მმართველ პარტია „ქართულ ოცნებასთან“.

Bankwatch-ის გამოცდილებიდან ცხადია, რომ სამოქალაქო საზოგადოებას გადამწყვეტი მნიშვნელობა აქვს საინვესტიციო პროექტების განხორციელების რისკების შესამცირებლად, კორუფციის თავიდან ასაცილებლად, სახელმწიფო ფინანსების ბოროტად გამოყენების თავიდან ასაცილებლად და საზოგადოებისთვის სარგებლის გაზრდისთვის. ამიტომ, განვითარების ბანკების ინტერესებშია უზრუნველყონ, რომ სამოქალაქო საზოგადოებამ განაგრძოს თავისი არსებითი როლის შესრულება საინვესტიციო პროექტების წარმატებასა და მდგრადობაში", - ნათქვამია განცხადებაში.