„თვითმკვლელობით შენიღბული მკვლელობები“ - ნიკა გვარამია ირაკლი ღარიბაშვილის წერილს ეხმაურება და საეჭვო გარდაცვალების შემთხვევების ჩამონათვალს აქვეყნებს

ექსპრემიერ ირაკლი ღარიბაშვილის მიერ ციხიდან გავრცელებულ მორიგ წერილს „კოალიცია ცვლილებისთვის“ ერთ-ერთი ლიდერი, ნიკა გვარამია ეხმაურება.

გვარამიას თქმით, ღარიბაშვილის განცხადებები, სადაც ის ირაკლი კობახიძესა და მამუკა მდინარაძეს მძიმე ბრალდებებს უყენებს, უყურადღებოდ ვერ დარჩება.

„ღარიბაშვილი თავის წერილში თვითმკვლელობით შენიღბულ მკვლელობებში რომ ამხელს კობახიძესა და მდინარაძეს, უინტერესო და დასაიგნორირებელი ვერ იქნება“, - აცხადებს გვარამია.

ნიკა გვარამია იხსენებს ბოლო პერიოდში მომხდარი თვითმკვლელობებისა თუ თვითმკვლელობის მცდელობების შემთხვევებს, რომლებზეც, მისი თქმით, საზოგადოებაში ლეგიტიმური შეკითხვები არსებობს:

• თორნიკე რიჟვაძე (2025 წლის ივლისი) — თვითმკვლელობის მცდელობა;

• დავით გოგობერიშვილი (2025 წლის ოქტომბერი) — გლდანის ციხის დირექტორი (ფიგურირებდა ბაჩიაშვილის საქმეში);

• სუს-ის თანამშრომელი (2025 წლის ოქტომბერი) — ნაპოვნია ჩაქვის ტურბაზის ტერიტორიაზე (ვინაობა სუს-ს არ გაუმჟღავნებია);

• სიმონ წაქაძე (2026 წლის იანვარი) — სუს-ის ანტიკორუფციული სააგენტოს უფროსი ინსპექტორი;

• ლაზარე ჯორბენაძე (2026 წლის აპრილი) — უფლებადამცველი, წარსულში კონტრდაზვერვის თანამშრომელი (როგორც ღარიბაშვილი წერს, ამ რიგში უნდა განვიხილოთ);

• სუს-ის ანტიკორუფციული სააგენტოს თანამშრომელი (2026 წლის მაისი) — ნაპოვნია ხაშურში, საკუთარ მანქანაში (ვინაობა სუს-ს არ გაუმჟღავნებია);

• ბაქარ ბექაური (2026 წლის 7 ივნისი) — გორის პოლიციის განყოფილების დეტექტივი (მონაწილეობდა გორის პოლიციელების მიერ მოქალაქის ცემის სკანდალში, რისი ვიდეოკადრებიც გავრცელდა);

• დავით ნანავა (2026 წლის აგვისტო) — ღარიბაშვილის ცოლისძმის სიმამრი. ფართოდ გავრცელებული, თუმცა დაუდასტურებელი ინფორმაციით, სიცოცხლე თვითმკვლელობით სუს-ისა და პროკურატურის ზეწოლის შედეგად დაასრულა.

„ჩამონათვალში არის სახელები და გვარები, ვისთან დაკავშირებითაც საზოგადოებაში არსებობს ლეგიტიმური შეკითხვები. ღარიბაშვილის დღევანდელი განცხადება, ბუნებრივია, ამ შეკითხვებს მეტ სიმწვავესა და აქტუალურობას სძენს“, - აღნიშნავს ნიკა გვარამია.