ვიდეო - როგორ დააკავეს იზოლატორიდან გამოსული გიგი უგულავა სისხლის სამართლის ბრალდებით

რეპრესიების ახალი ტალღა - ოპოზიციონერი პოლიტიკოსი გიგი უგულავა წინასწარი დაკავების იზოლატორიდან გამოიყვანეს, მოულოდნელად ეზოშივე სისხლის სამართლის მუხლით ბრალი წაუყენეს და უკან შეაბრუნეს.

ფაქტის ამსახველი ექსკლუზიური კადრები "ტვ პირველმა" გადაიღო.

გიგი უგულავა "პირველებთან" ამბობს, რომ მას ბრალი სისხლის სამართლის საქმეზე წარუდგინეს. პოლიტიკოსს ჯგუფურად მაგისტრალის გადაკეტვას ედავებიან. აღნიშნული ბრალი 4 წლამდე პატიმრობას გულისხმობს.

უგულავა წაყენებულ ბრალს დაშინების მცდელობად აფასებს.

გიგი უგულავას ადვოკატი სასამართლოსკენ მიემართებოდა, როდესაც გაიგო, რომ მისი დაცვის ქვეშ მყოფი სამმართველოში შეაბრუნეს და ამჯერად საქმე სისხლის სამართლის დანაშაულს ეხებოდა.

ირაკლი აბესაძე ამბობს, რომ ბრალდება აბსურდულია. მისი თქმით, თბილისი მოლთან მაგისტრალი საერთოდ არ გადაკეტილა და როგორც ჩანს, ახლა ივანიშვილმა გადაწყვიტა, ადმინისტრაციული წესით დაკავებული ადამიანები მეტად გააწვალოს და ახლა უკვე მათ სისხლის სამართლის დანაშაულს ედავებიან.

ის, რომ სახელმწიფო არ გვაქვს, ამას საზოგადოება კარგად ხედავს, მაგრამ ეს, მართლა, ცირკიც აღარ არის და ვერცერთ დაწესებულებას ვერ შეადარებ. უბრალოდ, ქაოსია. ვერც თქვენს შეკითხვაზე, რა მტკიცებულებები შეიძლება, ჰქონდეთ, ვერ ვუპასუხებ სამართლებრივ ენაზე, იმიტომ, რომ უბრალოდ, აბსურდულია ასეთი ტიპის ბრალდების წაყენება, იმიტომ, რომ ყველა მტკიცებულება გადაიცემოდა პირდაპირ ეთერში, მათ შორის, ტვ პირველის მაყურებელი პირდაპირ ეთერში უყურებდა, რა ხდებოდა თბილისი მოლის მიმდებარე ტერიტორიაზე და ის დანაშუალი, რომელიც სახელდახელოდ წინა დღეს გამოაცხადეს დანაშაულად და სტრატეგიულ ობიექტად აქციეს თბილისის შემოსასვლელი და თბილისი მოლის მიმდებარე ტერიტორია, საერთოდ არ გადაკეტილა. არა თუ პირადად უგულავას მიერ არ გადაკეტილა, და ხალსახად ჩანს ის სად იმყოფებდა მთელი აქციის განმავლობაში, არამედ, საერთოდ არ გადაკეტილა. თუ რამდენიმე წუთით გადაიკეტა, ისიც პოლიციის გადაადგილების გამო იყო ტერიტორია გადაკეტილი. ის დანაშაულიც კი არ მომხდარა, რა აბსურდული დანაშაულიც წინა დღეს შეთხზეს და მოიგონეს, რომ ეს ყოფილიყო დანაშაული. ამიტომ, აეთ სიტუაციაში, როდესაც ადამიანები ჯერ ადმინისტრაციული წესით დააკავეს, 48 საათი იწურებოდა, რაც ის ადმინისტრაციულ პატიმრობაში იყო. მერე, როგორც ჩანს, ვიღაცამ და ეს ვიღაც მაღალი ალბათობით, ივანიშვილი იყო, მოიფიქრა, რომ მოდი, ახლა ეს ხალხი უფრო მეტად გავაწვალოთ, უფრო მეტად დავაშინოთ და ახლა სისხლის სამართლის წესით წაუყენეს ბრალი, - ამბობს ირაკლი აბესაძე. 
ცოტა ხნის წინ დიღმის სამმართველოში შეაბრუნეს დიმა ბიძინაშვილიც. მისი თქმით, "სამშბლოს სიყვარულისთვის ისჯება".

შეგახსენებთ, „თბილისი მოლთან“ დაკავებულ 8 პირს შორის, რომელთაც სისხლის სამართლის წესით ჩადენილ დანაშაულს ედავებიან, ერთ-ერთი გიგი უგულავაა.