„ყველაფერს დავივიწყებთ, მთავარია, იქიდან დავინახოთ კონკრეტული ნაბიჯები“ - კობახიძე აშშ-ზე

რა თქმა უნდა, იგვიანებს. როგორც კი აშშ-ის ახალი ადმინისტრაცია შევიდა ოფისში, მაშინვე გავაკეთეთ ძალიან ხმამაღალი საჯარო განცხადება იმასთან დაკავშირებით, რომ გვსურს სტრატეგიული პარტნიორობის განახლება კონკრეტული გზამკვლევით. ეს გავიმეორეთ არაერთხელ.

რა თქმა უნდა, იგვიანებს და იგვიანებს იმ მიზეზით, რომ ჩვენ დღემდე არ მოგვისმენია პასუხი, რაც გასაკვირია ერთი მარტივი მიზეზის გამო - ხედავთ, რომ სრული ღირებულებითი თანხვედრა არის. რაც გაცხადებულია აშშ-ის ახალი ადმინისტრაციის მხრიდან, ის არის მთლიანად თანხვედრაში ჩვენს პოლიტიკასთან, ჩვენს ღირებულებებთან, მიზნებთან და ა.შ.

ჩვენ მოთმინებით დაველოდებით, ვნახავთ. ვინ გაიმარჯვებს საბოლოო ჯამში, დიფ სთეითი თუ ტრამპის ადმინისტრაცია, მათ შორის, აშშ-ის სახელმწიფო დეპარტამენტზე უფრო ძლიერი აღმოჩნდება ახალი ადმინისტრაციის გავლენა, თუ დარჩება ისევ ძლიერი დიფ სთეითის გავლენა. ვნახოთ, მოთმინებით ველოდებით ამ ყველაფერს.

გარკვეული იმპულსები იყო. მათ შორის მთავარი იმპულსი ჩვენთვის იყო ის დღე, როდესაც ახალმა ადმინისტრაციამ რეალურად გაათავისუფლა აშშ-ის ყოფილი ელჩი საქართველოში, ქალბატონი დანიგანი და იმავე დღეს დემონსტრაციულად მოგვცეს ე.წ აგრემანი ანუ თანხმობა ჩვენი ელჩის დანიშვნაზე. რა თქმა უნდა, ეს ძალიან კარგი ჟესტი იყო.

მთავარია, გაგრძელდეს ეს პროცესი. ჩვენი მხრიდან არის სრული მზაობა. მთავარია, ჩვენ ვიხილოთ ახალი ადმინისტრაციიდან კონკრეტული შემხვედრი ნაბიჯები იმ განცხადებაზე, რაც ჩვენ გვაქვს გაკეთებული. ჩვენ გვაქვს მაქსიმალური განცხადება გაკეთებული, ამაზე მეტი განცხადება არ შეიძლება გაკეთდეს - გვინდა სტრატეგიული პარტნიორობის განახლება სუფთა ფურცლიდან. ყველაფერს დავივიწყებთ, ყველაფერს, რაც მოხდა - რევოლუციის წახალისება,USAID, NED, ყველაფერ ამ უბედურებას დავივიწყებთ, სუფთა ფურცლიდან და ასევე, კონკრეტული გზამკვლევით, მზად ვართ, ნებისმიერი საკითხი განვიხილოთ, რა არის ამერიკული მხარის ინტერესებში, რა არის ქართული მხარის ინტერესებში, მზად ვართ, ყველაფერი ავსახოთ ახალ შეთანხმებაში, მთავარია, იქიდან დავინახოთ კონკრეტული ნაბიჯები.ივანიშვილის პრემიერი ირაკლი კობახიძე საზოგადოებრივი მაუწყებლის ეთერში, კითხვაზე, ხომ არ იგვიანებს ამერიკასთან სტრატეგიული პარტნიორობის გადატვირთვა.