9 მაისის აღლუმამდე 5 დღით, ადრე უკრაინამ მოსკოვს დრონებით შეუტია

9 მაისის აღლუმამდე 5 დღით ადრე უკრაინამ მოსკოვს დრონებით შეუტია - დაზიანებულია მრავალსართულიანი საცხოვრებელი კორპუსი, რომელიც კრემლიდან დაახლოებით 6 კილომეტრში მდებარეობს | ინფორმაციას უკრაინული მედია ავრცელებს. მათივე ცნობით, უკრაინული დრონი მოსკოვის ერთ-ერთ პრესტიჟულ უბანში მოსფილმოვსკაიას ქუჩაზე ჩამოვარდა. დაზიანებულია შენობის ზედა სართულების ფასადი და მინები. ადგილზე სამაშველო ჯგუფები მუშაობდნენ. მოსკოვის მერის, სერგეი სობიანინის თქმით, დაშავებული არავინაა. მოსკოვზე დრონებით შეტევის გამო, რიგები იყო აეროპორტშიც. ამასთან, გასულ ღამეს უკრაინამ რუსეთის რამდენიმე რეგიონს შეუტია, მათ შორის ვორონეჟს, სარატოვს, ბელგოროდს, ორიოლსა და ვოლგოგრადს, ასევე ანექსირებულ ყირიმს დრონებით უტევს და რუსეთის მიმართულებით 250-მდე კამიკაძე ტიპის დრონი მიფრინავს. მათი სამიზნე კი სამხედრო და ენერგოინფრასტრუქტურაა

 3 მაისს რუსულ მედიაში გავრცელდა ფოტო და ინფორმაცია, რომ მოსკოვში წითელ მოედანზე დრონსაწინააღმდეგო ბადეებს ამაგრებენ. მანამდე უკრაინულმა მედიამ გაავრცელა ინფორმაცია, რომ 9 მაისის აღლუმის წინ მოსკოვში დაახლოებით 280 საჰაერო თავდაცვის სისტემაა განლაგებული. მათივე ცნობით, საჰაერო თავდაცვის ქვედანაყოფების გადასროლა სხვადასხვა ქალაქებიდან მოხდა, მათ შორის ყაზანიდან და გროზნოდან. მოსკოვში უსაფრთხოების განსაკუთრებული ზომებია მიღებული, ქალაქის დაცვა რამდენიმე შრედ არის მოწყობილი. The insider-ის ცნობით, რუსეთში 9 მაისის აღლუმზე დასასწრებად თანხმობა 4 ქვეყნის ლიდერმა განაცხადა, 2025 წელს კი აღლუმს 27 ქვეყნის ლიდერი დაესწრო. 9 მაისის აღნიშვნაში მონაწილეობის შესახებ უკვე განაცხადა დსთ-ის სამი ქვეყნის ლიდერმა: ბელარუსის ლიდერმა ალექსანდრ ლუკაშენკომ, ყაზახეთის ლიდერმა ყასიმ-ჟომარტ თოყაევმა და ყირგიზეთის ლიდერმა სადირ ჯაფაროვმა. მოსკოვში ჩასვლის განზრახვის შესახებ განაცხადა ბოსნია და ჰერცეგოვინის სერბთა რესპუბლიკის მმართველი პარტიის ლიდერმა მილორად დოდიკმაც. გარდა ამისა, აღლუმს დაესწრება სლოვაკეთის პრემიერმინისტრი რობერტ ფიცო. ასევე, აღლუმს დაესწრებიან ოკუპირებული აფხაზეთისა და ე.წ. სამხრეთ ოსეთის ე.წ. პრეზიდენტები - ბადრა გუნბა და ალან გაგლოევი