პუტინის მიერ 9 მაისისთვის გამოცხადებული ზავის პასუხად, ზელენსკიმ 5-დან 6 მაისის ღამით, 00:00 საათიდან ცეცხლის შეწყვეტა გამოაცხადა

რუსეთის პრეზიდენტის ვლადიმერ პუტინის მიერ 9 მაისისთვის გამოცხადებული ზავის პასუხად, ვოლოდიმირ ზელენსკიმ დაწერა, რომ 5-დან 6 მაისის ღამით, 00:00 საათიდან უკრაინა ცეცხლის შეწყვეტას გამოაცხადებს.

ვოლოდიმირ ზელენსკის თქმით, უკრაინას ჯერ არ მიუღია არცერთი "ოფიციალური მიმართვა" საბრძოლო მოქმედებების შეწყვეტის შეთანხმების პირობებთან დაკავშირებით. "ჩვენ ვთვლით, რომ ადამიანის სიცოცხლე უფრო მაღალი ღირებულებაა, ვიდრე "აღნიშვნა" ნებისმიერი წლისთავის", -დაწერა ვოლოდიმირ ზელენსკიმ.

 ვოლოდიმირ ზელენსკის განმარტებით, ცეცხლის შეწყვეტა ძალაში 5-დან 6 მაისის ღამით, 00:00 საათიდან შევა და ეს პერიოდი საკმარისი იქნება იმის განსასაზღვრად, "შესაძლებელია თუ არა, რომ საბრძოლო მოქმედებები გულწრფელად შეწყდეს". "ამ მომენტიდან ჩვენ სარკისებურად ვიმოქმედებთ", - დაწერა ვოლოდიმირ ზელენსკიმ და დასძინა, რომ დროა, რუსეთის ხელმძღვანელობამ გადადგას რეალური ნაბიჯები მათ მიერ დაწყებული ომის დასასრულებლად.

 მანამდე, რუსეთმა, მეორე მსოფლიო ომში გამარჯვების დღესთან დაკავშირებით, 8-9 მაისს, უკრაიანსთან ცეცხლის ცალმხრივი შეწყვეტა გამოაცხადა. ამასთან, მოსკოვმა გააჟღერა მუქარა, რომ შეთანხმების დარღვევის შემთხვევაში კიევს "მასშტაბური სარაკეტო დარტყმით" უპასუხებს.

რუსეთის პრეზიდენტმა, ვლადიმერ პიტინმა აღნიშნული ინიციატივა პირველად გასულ კვირას გააჟღერა, როდესაც ტელეფონით ესაუბრა აშშ-ის პრეზიდენტს დონალდ ტრამპს.

რუსეთის თავდაცვის სამინისტროს განცხადებით, ზავი ძალაში შევა 8 მაისიდან და გაგრძელდება 9 მაისამდე. უწყების ცნობით, გადაწყვეტილება მიღებულია "რუსეთის შეიარაღებული ძალების უმაღლესი მთავარსარდლის" ბრძანების საფუძველზე და მოსკოვი იმედოვნებს, რომ უკრაინაც ანალოგიურ ნაბიჯს გადადგამს.

ამავე განცხადებაში მკაცრი გაფრთხილებაც გაკეთდა: თუ კიევი შეეცდება გამარჯვების დღის ღონისძიებების ჩაშლას, რუსეთი განახორციელებს "საპასუხო მასშტაბურ სარაკეტო დარტყმას ქალაქის ცენტრზე“. მოსახლეობასა და უცხოურ დიპლომატიურ მისიებს მოუწოდეს, საჭიროების შემთხვევაში დატოვონ ქალაქი.