„უკრაინულ დრონებს შეუძლიათ მოსკოვში 9 მაისის აღლუმზე ჩაფრინდნენ“ - ზელენსკი

„უკრაინულ დრონებს შეუძლიათ მოსკოვში 9 მაისის აღლუმზე ჩაფრინდნენ“ | აცხადებს უკრაინის პრეზიდენტი ვოლოდიმირ ზელენსკი ერევანში მიმდინარე სამიტზე სიტყვით გამოსვლისას

რუსეთმა 9 მაისის აღლუმი გამოაცხადა, თუმცა ამ აღლუმზე სამხედრო ტექნიკა არ იქნება. თუ ეს მართლაც ასეა, მრავალი წლის განმავლობაში ეს პირველი შემთხვევა იქნება, როდესაც ისინი აღლუმზე შეიარაღების გამოყვანას ვერ ახერხებენ. ამ აღლუმზე უკრაინულ დრონებსაც შეუძლიათ გადაფრენა" | თქვა ზელენსკიმ. მისივე თქმით, ეს კარგი სიგნალია იმისა, რომ რუსეთის ფედერაცია აღარ გამოიყურება ისე ძლიერად, როგორც ადრე: „ამ ზაფხულს პუტინი გადაწყვეტს, რა გააკეთოს შემდეგ - გააფართოოს ომი თუ წავიდეს დიპლომატიური გზით. ჩვენ მას დიპლომატიისკენ უნდა ვუბიძგოთ“ | ამბობს ზელენსკი.

 9 მაისის აღლუმამდე 5 დღით ადრე უკრაინამ მოსკოვს დრონებით შეუტია, რის გამოც მრავალსართულიანი საცხოვრებელი კორპუსი დაზიანდა. შენობა კრემლიდან დაახლოებით 6 კილომეტრში მდებარეობს. მოსკოვზე დრონებით შეტევის გამო, რიგები იყო აეროპორტშიც. ამასთან, გასულ ღამეს უკრაინამ რუსეთის რამდენიმე რეგიონს შეუტია, მათ შორის ვორონეჟს, სარატოვს, ბელგოროდს, ორიოლსა და ვოლგოგრადს, ასევე ანექსირებულ ყირიმს. დრონების სამიზნე რუსეთის სამხედრო და ენერგოინფრასტრუქტურაა

 3 მაისს რუსულ მედიაში გავრცელდა ფოტო და ინფორმაცია, რომ მოსკოვში წითელ მოედანზე დრონსაწინააღმდეგო ბადეებს ამაგრებენ. მანამდე უკრაინულმა მედიამ გაავრცელა ინფორმაცია, რომ 9 მაისის აღლუმის წინ მოსკოვში დაახლოებით 280 საჰაერო თავდაცვის სისტემაა განლაგებული. მათივე ცნობით, საჰაერო თავდაცვის ქვედანაყოფების გადასროლა სხვადასხვა ქალაქებიდან მოხდა, მათ შორის ყაზანიდან და გროზნოდან. მოსკოვში უსაფრთხოების განსაკუთრებული ზომებია მიღებული, ქალაქის დაცვა რამდენიმე შრედ არის მოწყობილი. The insider-ის ცნობით, რუსეთში 9 მაისის აღლუმზე დასასწრებად თანხმობა 4 ქვეყნის ლიდერმა განაცხადა, 2025 წელს კი აღლუმს 27 ქვეყნის ლიდერი დაესწრო. 9 მაისის აღნიშვნაში მონაწილეობის შესახებ უკვე განაცხადა დსთ-ის სამი ქვეყნის ლიდერმა: ბელარუსის ლიდერმა ალექსანდრ ლუკაშენკომ, ყაზახეთის ლიდერმა ყასიმ-ჟომარტ თოყაევმა და ყირგიზეთის ლიდერმა სადირ ჯაფაროვმა. მოსკოვში ჩასვლის განზრახვის შესახებ განაცხადა ბოსნია და ჰერცეგოვინის სერბთა რესპუბლიკის მმართველი პარტიის ლიდერმა მილორად დოდიკმაც. გარდა ამისა, აღლუმს დაესწრება სლოვაკეთის პრემიერმინისტრი რობერტ ფიცო. ასევე, აღლუმს დაესწრებიან ოკუპირებული აფხაზეთისა და ე.წ. სამხრეთ ოსეთის ე.წ. პრეზიდენტები - ბადრა გუნბა და ალან გაგლოევი