უკრაინულმა დრონებმა რუსეთში Wildberries-ის საწყობებზე მიიტანეს იერიში – ზარალმა შესაძლოა 100 მილიარდ რუბლს გადააჭარბოს

18 ივლისის ღამეს, უკრაინულმა უპილოტო საფრენმა აპარატებმა რუსეთის რამდენიმე რეგიონზე მიიტანეს იერიში. დარტყმის ქვეშ მოჰყვა ცნობილი მარკეტპლეისის, Wildberries-ის ლოგისტიკური ცენტრები მოსკოვისა და ტამბოვის ოლქებში. ბოლო მონაცემებით, თავდასხმების შედეგად დაღუპულია 8 ადამიანი, ხოლო ათეულობით დაშავდა.

დარტყმა ტამბოვის ოლქზე ტამბოვის ოლქში თავდასხმა განხორციელდა ქალაქ კოტოვსკში მდებარე Wildberries-ის საწყობზე. რეგიონის გუბერნატორი, ევგენი პერვიშოვი ამტკიცებს, რომ საჰაერო თავდაცვის სისტემამ „იმუშავა“ და ქალაქთან მიახლოებისას 28 დრონი ჩამოაგდეს. მიუხედავად ამისა, ნგრევისა და ხანძრის თავიდან აცილება ვერ მოხერხდა.

ბოლო მონაცემებით, კოტოვსკის საწყობზე თავდასხმის შედეგად ღამის ცვლაში მომუშავე 7 თანამშრომელი დაიღუპა. დაშავდა კიდევ 25 ადამიანი, რომელთაგან 23 საავადმყოფოშია გადაყვანილი (მათი უმეტესობა ნამსხვრევებით არის დაჭრილი, ერთი კრიტიკულ, ხოლო ექვსი მძიმე მდგომარეობაშია). დილის 05:30 საათისთვის ღია ცეცხლის ლიკვიდაცია მოხერხდა, თუმცა ხანძრის ქრობის პროცესი გაგრძელდა.

თავდასხმა მოსკოვის ოლქზე უკრაინული დრონები დაესხნენ თავს მოსკოვის გარეუბანში, კერძოდ ქალაქ ელექტროსტალში მდებარე Wildberries-ის საწყობსაც. გარდა ამისა, დარტყმა განხორციელდა ნოგინსკში მდებარე ნავთობბაზის ტერიტორიაზე, რის გამოც, უსაფრთხოების მიზნით, ახლოს მდებარე სამშობიარო სახლიდან პაციენტების ევაკუაცია გახდა საჭირო.

მოსკოვის ოლქის გუბერნატორის, ანდრეი ვორობიოვის განცხადებით, რეგიონში საერთო ჯამში 37 ადამიანი დაშავდა (2 ნოგინსკში, 35 კი ელექტროსტალის საწყობში). მოგვიანებით ცნობილი გახდა, რომ ელექტროსტალში მიღებული ტრავმებისგან 1 დაშავებული გარდაიცვალა. დაშავებულთაგან 8 მძიმე მდგომარეობაშია.

უკრაინული მედია-არხები მოსკოვის ოლქში მდებარე ლოგისტიკურ ცენტრში გაჩენილი მასშტაბური ხანძრის ამსახველ კადრებს ავრცელებენ.

ექსპერტების წინასწარი შეფასებით, ელექტროსტალის ლოგისტიკური ცენტრი პრაქტიკულად სრულად არის განადგურებული. ხანძრის შედეგად მიყენებულმა ფინანსურმა ზარალმა შესაძლოა 100 მილიარდ რუბლს გადააჭარბოს.

რატომ გახდა სამიზნე Wildberries? – ზელენსკის განმარტება აღნიშნულ იერიშებს უკრაინის პრეზიდენტი ვოლოდიმირ ზელენსკი გამოეხმაურა. მან მომხდარს უწოდა პასუხი რუსეთის მიერ უკრაინის სამოქალაქო ინფრასტრუქტურაზე, კერძოდ, უკრაინული კერძო საფოსტო კომპანიის, „ნოვა პოშტას“ (Нова пошта) ობიექტებზე განხორციელებულ თავდასხმებზე (ბოლო ასეთი დარტყმა ორ დღეში ერთხელ ფიქსირდებოდა). ამავე ვერსიას მაღალჩინოსნებზე დაყრდნობით ადასტურებს Financial Times-ის ჟურნალისტი კრისტოფერ მილერიც.

გარდა ამისა, ზელენსკიმ განაცხადა, რომ აღნიშნულ საწყობებს რუსეთი სამხედრო მიზნებისთვის იყენებდა:

„სამიზნე გახდა ორი მსხვილი ლოგისტიკური ობიექტი მოსკოვისა და ტამბოვის რეგიონებში, რომლებიც ფრონტის ხაზიდან 500 და 700 კილომეტრის დაშორებით მდებარეობს. აგრესორი მათ იყენებდა სანქცირებული კომპონენტების მისაწოდებლად, რომლებიც დრონებისა და სანავიგაციო აღჭურვილობის წარმოებისთვის არის საჭირო“, — განაცხადა ზელენსკიმ.

სოციალურ ქსელებში ასევე აღნიშნავენ, რომ Wildberries-ის პლატფორმაზე თავისუფლად იყიდება ომისთვის განკუთვნილი საქონელი, მათ შორის ჯავშანჟილეტები, სამხედრო ჩაფხუტები, შენიღბვის კოსტიუმები და დრონებისთვის საჭირო ოპტიკურ-ბოჭკოვანი აღჭურვილობა.