11 წლის შემდეგ გახსნილი გიორგი კვარაცხელიას მკვლელობა - რას წერდა "ნიუპოსტი" 2015 წელს მომხდარ დანაშაულზე

2015 წელს მომხდარი, გიორგი კვარაცხელიას ჯგუფურად, განზრახ მკვლელობის სისხლის სამართლის საქმე გახსნილია. პროკურატურის ინფორმაციით, აღნიშნულ სისხლის სამართლის საქმეზე ორ პირს - თორნიკე კაჭარავასა და დავით დეკანოსიძეს ბრალდება წარედგინება.

გამოძიებით დადგინდა, რომ 2015 წლის 25 დეკემბერს, თბილისში, ფანჯიკიძის ქუჩაზე, ბრალდებულებმა წარსულში მომხდარი უთანხმოების გამო შურისძიების მიზნით, ცეცხლსასროლი იარაღიდან მრავლობითი გასროლით სასიკვდილოდ დაჭრეს გიორგი კვარაცხელია.

თორნიკე კაჭარავას ბრალი საპატიმროში წარედგინა, ხოლო დავით დეკანოსიძეს — დაუსწრებლად (მასზე ძებნა გამოცხადდება). წარდგენილი მუხლი (სსკ-ის 109-ე მუხლი) 17 წლამდე პატიმრობას ითვალისწინებს. პროკურატურა ბრალდებულებისთვის აღკვეთის ღონისძიებად პატიმრობის შეფარდებას მოითხოვს. საქმეზე გამოძიება გრძელდება.

"ნიუპოსტის" არქივში იძებნება სტატია, რომელიც 11 წლის წინ მომხდარ მკვლელობას ეხება. 

📰 თბილისში ბუდაპეშტის ქუჩაზე მომხდარ სროლას 21 წლის ახალგაზრდის სიცოცხლე ემსხვერპლა. გოგა კვარაცხელია, რომელსაც მეგობრები "კვარას" ეძახდნენ გუშინ საკუთარ სახლთან თავის არეში ცეცხლსასროლი იარაღით დაჭრეს. სამწუხაროდ ჭრილობა იმდენად მძიმე აღმოჩნდა საავადმყოფოში გადაყვანის მიუხედავად ექიმებმა ახალგაზრდის სიცოცხლის გადარჩენა ვერ შეძლეს.

მომხდარი მკვლელობის ერთ-ერთ ვერსიად ანგარიშსწორება სახელდება, თუმცა ახლობლები "ნიუპოსტთან" საუბარში ვერ აკონკრეტებენ ვისთან შეიძლება ჰქონოდა გოგა კვარაცხელიას მსგავსი ტიპის დაპირისპირება, რომ 21 წლის ახალგაზრდა სასიკვდილოდ გაემეტებინათ და საკუთარ სახლთან ჩაეცხრილათ.

გოგა კვარაცხელია 161-ე სკოლაში სწავლობდა, პედაგოგები მას კარგ მოსწავლედ ახასიათებენ. მათი თქმით გოგა ბავშვობიდანვე სამართლიანი და მეგობრების მიმართ სოლიდარული იყო.

"ის ძალიან სამართლიანი, მეგობრული, კარგ ოჯახში აღზრდილი იყო. შოკირებული ვართ, ვის შეეძლო მოეკლა ასეთი კარგი ბიჭი?!"- აცხადებს "ნიუპოსტთან" გოგას სკოლის პედაგოგი.

ნიუპოსტი 2015 წლის 26 დეკემბერი