„გაუპატიურების ერთი ეპიზოდი მამის საფლავზე მოხდა“ - ნატა ვიბლიანმა პოლიციას ოთხი სავარაუდო მოძალადის გვარი დაუსახელა

ნატა ვიბლიანმა პოლიციას ის ოთხი პირი დაასახელა, ვინც მასზე სექსუალურად იძალადა. ამის შესახებ ჟურნალისტებს ვიბლიანის ადვოკატმა, მარიამ ბარსონიძემ, ვაკე-საბურთალოს პოლიციის სამმართველოში გამოკითხვის დასრულების შემდეგ განუცხადა.

უფლებადამცველის თქმით, საქმე ეხება არა მხოლოდ მძიმე სექსუალურ ძალადობას, არამედ სისტემატურ მუქარასაც.

„მისი გაუპატიურების ერთი ეპიზოდი მოხდა მამის საფლავზე. სასაფლაოს ეპიზოდში ფიგურირებს ჩხვიმიანი. დაასახელა ის ოთხი პირი, ვინც მასზე იძალადა სექსუალურად, თუმცა ამ შემთხვევაში მხოლოდ სექსუალური ძალადობა არ გვაქვს სახეზე. სახეზე გვაქვს სექსუალური ძალადობა, რომელსაც თან ახლავს არაერთი მუქარა სიცოცხლის მოსპობის, იარაღის თანხლებით“, — განაცხადა ადვოკატმა მარიამ ბარსონიძემ.

ნატა ვიბლიანი ვაკე-საბურთალოს პოლიციის განყოფილებაში ჩვენებას უკვე მეორე დღეა აძლევს.

საქმეზე გამოძიება დაახლოებით ერთი თვის წინ, სოციალურ ქსელში გავრცელებული სკანდალური ვიდეომიმართვების საფუძველზე დაიწყო. ვიბლიანი აცხადებს, რომ 90-იან წლებში, რამდენიმე წლის განმავლობაში, მასზე სისტემატურად იძალადებდა თანასოფლელი, სრულწლოვანი მამაკაცი. მოგვიანებით, მან გაუპატიურებაში ბრალი კიდევ სამ თანასოფლელს დაადო.

შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტში გამოძიება სისხლის სამართლის კოდექსის 137-ე მუხლით (გაუპატიურება) მიმდინარეობს.