ინტერნეტმუქარა და შანტაჟი არასრულწლოვნების მიმართ - შსს-მ გამოძიება დაიწყო

შინაგან საქმეთა სამინისტრო განცხადებას ავრცელებს და განმარტავს, რომ სოციალურ ქსელში, ერთ-ერთი გვერდის მეშვეობით ვრცელდება სხვადასხვა პირის, მათ შორის არასრულწლოვანების მიმართ შეურაცხმყოფელი ტექსტები, ასევე, ფოტოშოპისა და მონტაჟის გამოყენებით რედაქტირებული ფოტო-ვიდეომასალა.

უწყების განმარტებით, შინაგან საქმეთა სამინისტრომ ფაქტთან დაკავშირებით გამოძიება დაიწყო, ხოლო დანაშაულის ჩამდენი პირების დადგენისა და სისხლის სამართლის პასუხისგებაში მიცემის მიზნით, სამართალდამცველები აქტიურ საგამოძიებო მოქმედებებს ატარებენ.

„სოციალურ ქსელში, ერთ-ერთი გვერდის მეშვეობით ვრცელდება სხვადასხვა პირის, მათ შორის არასრულწლოვანების მიმართ შეურაცხმყოფელი ტექსტები, ასევე, ფოტოშოპისა და მონტაჟის გამოყენებით რედაქტირებული ფოტო-ვიდეომასალა. აღნიშნულ ფაქტთან დაკავშირებით, შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, გამოძიება საქართველოს სისხლის სამართლის კოდექსის 255-ე მუხლის მე-3 და მე-4 ნაწილებით დაიწყეს, რაც წინასწარი შეცნობით არასრულწლოვანის გამოსახულების შემცველი პორნოგრაფიული ნაწარმოების შეძენა-შენახვა-ფლობას ან გავრცელებას გულისხმობს. დანაშაულის ჩამდენი პირების დადგენისა და სისხლის სამართლის პასუხისგებაში მიცემის მიზნით, სამართალდამცველები აქტიურ საგამოძიებო მოქმედებებს ატარებენ“, - აღნიშნულია შსს-ის განცხადებაში.

ცნობისთვის, მანამდე გავრცელდა ინფორმაცია, რომ სოციალურ ქსელში უცნობი მომხმარებელი არასრულწლოვანების და მათი მშობლების ღირსების შემლახავი შინაარსის დამონტაჟებულ ფოტო და ვიდეო მასალას ავრცელებს. ის 10 000 ლარს ითხოვს, წინააღმდეგ შემთხვევაში, სამ ადამიანს სიცოცხლის მოსპობით ემუქრება.

როგორც ერთ-ერთი დაზარალებული ბავშვის მშობელი „კახეთის ხმასთან“ აცხადებდა, უცნობი პირი Instagram-ის ანგარიშის საშუალებით ბავშვების პროფილებიდან ფოტოებს იღებდა, მათ ფოტომონტაჟს უკეთებდა და შეურაცხმყოფელი შინაარსის მასალებს ავრცელებდა.

მშობლის ინფორმაციით, შემთხვევები 29 ივლისს, ღამის საათებში დაიწყო და სავარაუდოდ, დაახლოებით 50 არასრულწლოვანს შეეხო. მისივე თქმით, ბავშვების მიმართ ხორციელდებოდა მუქარა და შანტაჟი, მათ შორის, ერთ-ერთი მუქარა სამ გოგონას სიცოცხლის მოსპობას ეხებოდა.

მშობელი ამბობს, რომ მომხდარმა რამდენიმე არასრულწლოვანზე მძიმე ფსიქოლოგიური გავლენა იქონია და ორი ბავშვი საავადმყოფოშიც გადაიყვანეს.

მისივე ინფორმაციით, შემთხვევების შესახებ სამართალდამცავ უწყებებს უკვე აცნობეს და შეტანილია დაახლოებით 50 საჩივარი. ამ ეტაპზე მიმდინარეობს გამოძიება და სავარაუდო პირის იდენტიფიცირება.