მსჯავრდებული ამბობს, რომ №6 დაწესებულებაში მასზე სექსუალურად იძალადეს - რას აცხადებენ პენიტენციური სამსახური და სახალხო დამცველი

სპეციალური პენიტენციური სამსახური კატეგორიულად უარყოფს №6 პენიტენციურ დაწესებულებაში მსჯავრდადებულ გიორგი დავითაძეზე სექსუალური ძალადობის შესახებ გავრცელებულ ინფორმაციას და მას „სრულ სიცრუესა და უწყების დისკრედიტაციის მცდელობას“ უწოდებს.

უწყების განცხადებით, მაღალი საჯარო ინტერესის გათვალისწინებით, ისინი მზად არიან კანონით დადგენილი წესით გაასაჯაროონ დეესკალაციის ოთახის ვიდეოჩანაწერები. პენიტენციური სამსახურის ცნობით, აღნიშნული მასალა საგამოძიებო ორგანოებმა და სახალხო დამცველის წარმომადგენლებმა უკვე შეამოწმეს და დანაშაულის ნიშნები არ გამოკვეთილა.

36 წლის მსჯავრდადებულმა გიორგი დავითაძემ სააპელაციო სასამართლოს სხდომაზე განაცხადა, რომ დაწესებულების დეესკალაციის ოთახში მასზე ბადრაგის თანამშრომლებმა სექსუალურად იძალადეს და დამამცირებლად მოექცნენ. მან აღნიშნა, რომ პროტესტის ნიშნად შიმშილობას დაიწყებს, თუ დასახელებული პირების პასუხისმგებლობის საკითხი არ დადგება.

მსჯავრდადებულის ოჯახი, რომელიც პენიტენციური დაწესებულების დირექტორისა და რამდენიმე თანამშრომლის დასჯას ითხოვს, აცხადებს, რომ პატიმარზე შურისძიება ხორციელდება.

სასამართლო სხდომაზე პროკურატურის წარმომადგენელმა დაადასტურა, რომ დავითაძის მიერ აღწერილ ფაქტზე გამოძიება მიმდინარეობს.

გიორგი დავითაძე სასჯელს პოლიციელის დაჭრის საქმეზე იხდის. პენიტენციური სამსახურის განმარტებით კი, იგი სისტემატურად არღვევდა შინაგანაწესს, რის გამოც იგი დეესკალაციის საკანში იყო მოთავსებული.

სახალხო დამცველი ლევან იოსელიანი მედიასთან საუბარში დღეს, 2 ოქტომბერს, გამოეხმაურა მსჯავრდადებულ გიორგი დავითაძის მიერ სააპელაციო სასამართლოში გაკეთებულ განცხადებას, რომ რუსთავის მე-6 საპატიმროში ბადრაგებმა მასზე სექსუალურად და ფსიქოლოგიურად იძალადეს.

ლევან იოსელიანის განცხადებით, საკითხი და ვიდეომასალა დეტალურად შეისწავლეს და ძალადობის ამსახველი მტკიცებულებები ვერ ნახეს.

"ეს საკითხი ჩვენს მიერ დეტალურად იქნა შესწავლილი, მათ შორის, მოვითხოვეთ დაარქივებული მასალებიც და ვნახეთ ვიდეოჩანაწერები. ფიზიკური არასათანადო მოპყრობის ან ძალადობის რაიმე ტიპის ამსახველი მტკიცებულება ჩვენ ვერ ვნახეთ. რაც შეეხება, ის ასევე უთითებდა სიტყვიერ შეურაცხყოფაზე, ამასთან დაკავშირებით მივმართეთ პროკურატურას და პროკურატურამ დაიწყო გამოძიება. ამაზე მეტს ვერაფერს ვერ გეტყვით", - თქვა ლევან იოსელიანმა.