ნეტგაზეთი: ახალი საქმე ღარიბაშვილის წინააღმდეგ? – "მოწმემ ის ქოლ-ცენტრების მფარველად დაასახელა"

„ქრონიკა პლუსის“ დამფუძნებლის, ელისო კილაძის საქმეზე სასამართლოში მოწმის სახით გამოკითხულმა გივი ჯიბლაძემ დახურულ სხდომაზე განაცხადა, რომ ყოფილი პრემიერ-მინისტრი ირაკლი ღარიბაშვილი თაღლითურ ქოლ-ცენტრებს მფარველობდა. ამის შესახებ "ნეტგაზეთი" წერს. 

ადვოკატ ნათია კორკოტაძის ცნობით, ჯიბლაძემ აღნიშნა, რომ პრემიერ-მინისტრის თანამდებობაზე მოსვლის შემდეგ ღარიბაშვილმა ფინანსთა სამინისტროს საგამოძიებო სამსახური პროცესებს ჩამოაშორა და ქოლ-ცენტრების სქემა თავად ჩაიგდო ხელში. დამცველის თქმით, ეს ცნობები ჯიბლაძეს გამოძიებისთვისაც აქვს მიწოდებული, თუმცა სამართალდამცავებს ღარიბაშვილი ამ საკითხზე ჯერ არ გამოუკითხავთ.

გივი ჯიბლაძემ სასამართლო შენობის დატოვებისას ჟურნალისტებთან უარყო გავრცელებული ცნობა და მოკლედ განაცხადა: „მე ეგ არ მითქვამს“.

ამ ეტაპზე უცნობია, წაუყენებენ თუ არა ყოფილ პრემიერს კიდევ ერთ ბრალს.

ყოფილ პრემიერ-მინისტრ ირაკლი ღარიბაშვილს ამჟამად სისხლის სამართლის ორი საქმე უკავშირდება: უკანონო შემოსავლის ლეგალიზაცია: ბრალი აღიარებულია, გაფორმებულია საპროცესო შეთანხმება და ის 5-წლიან სასჯელს იხდის.  24 აგვისტოს მას ახალი ბრალი წარედგინა — განსაკუთრებით დიდი ოდენობით ქრთამის ჯგუფურად აღება. ღარიბაშვილი ამ ბრალდებას არ აღიარებს და სამართლებრივ ბრძოლას აანონსებს.

„ქრონიკა +“-ის დამფუძნებელი ელისო კილაძე  თაღლითური ქოლ-ცენტრების საქმეზეა დაკავებული. მისი საქმე ცალკე წარმოებად გამოიყო. კილაძე ბრალს არ აღიარებს და პროცესებს მამუკა მდინარაძის მხრიდან შურისძიებად აფასებს. სასამართლო განხილვები დახურულ რეჟიმში მიმდინარეობს.

საქმეში ფიგურირებენ ყოფილი მთავარი პროკურორი ოთარ ფარცხალაძე, ძმები დავით და გიორგი მიქაძეები, ირაკლი სეხნიაშვილი და სხვები. ბრალდებულებმა — გივი ჯიბლაძემ, ბენ ანორმა, თორნიკე ჯანელიძემ და გიორგი კამლაძემ — პროკურატურის ცნობით, აღიარეს დანაშაული, ითანამშრომლეს გამოძიებასთან და ხელი შეუწყვეს ტრანსნაციონალური სქემის გახსნას. ამის საფუძველზე სასამართლომ ისინი გირაოს სანაცვლოდ გაათავისუფლა