რას ედავებოდნენ ლილუაშვილს - პროკურატურის განცხადება

საქართველოს პროკურატურა გრიგოლ ლილუაშვილის განაჩენთან დაკავშირებით განცხადებას ავრცელებს. უწყების ინფორმაციით, თბილისის საქალაქო სასამართლომ სრულად გაიზიარა პროკურატურის მიერ წარდგენილი მტკიცებულებები და განსაკუთრებით დიდი ოდენობით ქრთამის აღების ფაქტებზე სახელმწიფო უსაფრთხოების სამსახურის ყოფილი უფროსი, გრიგოლ ლილუაშვილი დამნაშავედ ცნო.

სასამართლოს გადაწყვეტილებით, ლილუაშვილს სასჯელის სახედ და ზომად 13 წლით თავისუფლების აღკვეთა განესაზღვრა.

ეპიზოდი 1: თაღლითური „ქოლ-ცენტრების“ მფარველობა

სასამართლოში გამოკვლეული მტკიცებულებებით დადასტურდა, რომ 2021–2022 წლებში გრიგოლ ლილუაშვილმა, თანამდებობრივი ავტორიტეტისა და ძალაუფლების გამოყენებით, თბილისში მოქმედი ორგანიზებული თაღლითური „ქოლ-ცენტრის“ მფარველობის სანაცვლოდ ქრთამის სახით 1 365 000 აშშ დოლარი აიღო.

ეპიზოდი 2: ქარის ელექტროსადგურების პროექტის ლობირება

2022 წელს ლილუაშვილმა ინვესტორს, რომელსაც ეკონომიკისა და მდგრადი განვითარების სამინისტროსთან ქარის ელექტროსადგურების მშენებლობის მემორანდუმის გაფორმება სურდა, საკითხის ლობირებისა და სასურველი შედეგის მისაღწევად ქრთამი მოსთხოვა. ეკონომიკის მინისტრის ყოფილი მოადგილის, რომეო მიქაუტაძის მეშვეობით მან ქრთამის სახით 1 000 000 აშშ დოლარი გამოართვა.

ეპიზოდი 3: გაზიფიკაციის ტენდერები

2022 წლის თებერვალში, ისევ რომეო მიქაუტაძის შუამავლობით, ლილუაშვილმა კომპანია „ექსპრესსერვისი 2008-ის“ დირექტორსა და დამფუძნებელს გაზიფიკაციის ტენდერებში გამარჯვებისა და ლობირების სანაცვლოდ ქრთამის სახით 1 500 000 ლარი გამოართვა.

ეპიზოდი 4: ბაგა-ბაღების სააგენტოს ე.წ. „ატკატების“ სქემა

სუს-ის ყოფილი უფროსი მფარველობდა თბილისის მერიის საბავშვო ბაგა-ბაღების მართვის სააგენტოს ყოფილ დირექტორს, კახაბერ გვანცელაძეს. გვანცელაძე და მისი თანამშრომლები შესყიდვების ხელშეკრულებების სანაცვლოდ მეწარმეებისგან განსაკუთრებით დიდი ოდენობის თანხებს (ე.წ. „ატკატებს“) იღებდნენ. 2018–2023 წლებში აღნიშნული დანაშაულებრივი ჯგუფის მიერ აღებულმა ქრთამმა სულ 5 325 943 ლარი შეადგინა.