თამაზ ელიზბარაშვილს ჩხრეკენ - შსს გამოძიებას მუქარისა და იარაღის უკანონო შეძენა-შენახვის მუხლებით აწარმოებს

ბიზნესმენ თამაზ ელიზბარაშვილს პირად ჩხრეკას უტარებენ. ჯერჯერობით უცნობია, მოჰყვება თუ არა აღნიშნულ საგამოძიებო მოქმედებებს მისი დაკავება.

როგორც შინაგან საქმეთა სამინისტროში აცხადებენ, გამოძიება სისხლის სამართლის კოდექსის ორი მუხლით მიმდინარეობს:

151-ე მუხლი - მუქარა;

236-ე მუხლი - ცეცხლსასროლი იარაღის მართლსაწინააღმდეგო შეძენა, შენახვა და ტარება.

ძაღლების თავშესაფრის „ფეისბუკ“ გვერდზე გავრცელებულ პირდაპირ ეთერში ისმის, როგორ უხსნის გამომძიებელი ელიზბარაშვილს, რომ მიმდინარეობს მისი პირადი ჩხრეკა, რაც 30 აგვისტოს მომხდარ ინციდენტს უკავშირდება.

თავად თამაზ ელიზბარაშვილი განმარტავს, რომ მას ტელეკომპანია „იმედის“ თანამშრომლებმა უჩივლეს, რომლებთანაც სიტყვიერი დაპირისპირება 30 აგვისტოს, ლისზე მდებარე რესტორან „სხვაში“ მოუვიდა. ბიზნესმენის მტკიცებით, მას თავს პოლიტიკური შეხედულებების გამო დაესხნენ:

„30-ში რესტორან 'სხვაში' ვიყავით მე და ჩემი მეუღლე, ტუალეტში ხელის დასაბანად ჩავედით, 8 კაცი მოვიდა, გადაკეტა კორიდორი და მეუბნებიან, ფეხს არ მოვიცვლით აქედან, სანამ ბოდიშს არ მოგვიხდიო. რატომ უნდა მოგიხადოთ ბოდიში, ვინ ხართ, არ გიცნობთ-მეთქი. ჩვენ TV 'იმედის' თანამშრომლები ვართო, შენი პოზიცია არ მოგვწონს, უკრაინას მხარს რომ უჭერ და რუსებს რომ აგინებო, არ 'გვევასებიო' და ბოდიში უნდა მოგვიხადოო. ვუთხარი, ცოლს დავტოვებ სახლში, ნახევარ საათში ჩამოვალ და დაგელაპარაკებით-მეთქი. მეუღლე დავტოვე, არც დამჭირდა ნახევარი საათი, 20 წუთში ჩამოვედი და ესენი გაიქცნენ, არცერთი არ დამხვდა და ახლა ესენი მიჩივიან მე?!“ — აცხადებს ელიზბარაშვილი გავრცელებულ ვიდეოში.

აღნიშნულ ინციდენტთან დაკავშირებით, 31 აგვისტოს, თამაზ ელიზბარაშვილმა სოციალურ ქსელში პოსტიც გამოაქვეყნა:

„ტვ 'იმედის' თანამშრომლებო, წუხელ ლისზე, რესტორან 'სხვაში' ჩემთან ძალიან შეგეშალათ. დღის ბოლომდე გაძლევთ დროს ბოდიშის მოსახდელად“.

საქმეზე საგამოძიებო პროცედურები გრძელდება.