არასრულწლოვანი, რომელიც თბილისში, გამთენიისას მოკლეს, 17 წლის დავით ნარიმანიძეა

არასრულწლოვანი, რომელიც თბილისში, ურთიერთშელაპარაკების ნიადაგზე მოკლეს, 17 წლის დავით ნარიმანიძეა. შინაგან საქმეთა სამინისტროს ინფორმაციით, დანაშაულში ბრალდებული არასრულწლოვანი ცხელ კვალზე უკვე დაკავებულია.

გამოძიების ცნობით, შემთხვევა გამთენიისას მოხდა.

„გამოძიებით დადგინდა, რომ ბრალდებულმა, მიმდინარე წლის 10 სექტემბერს, თბილისში, ურთიერთშელაპარაკების ნიადაგზე, ცივი იარაღის გამოყენებით რამდენიმე ჭრილობა მიაყენა არასრულწლოვანს და ადგილიდან მიიმალა. მიყენებული დაზიანებების შედეგად არასრულწლოვანი შემთხვევის ადგილზევე გარდაიცვალა. სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად, დანაშაულში ბრალდებული პირი ცხელ კვალზე დააკავეს“, - ნათქვამია შსს-ს ოფიციალურ ინფორმაციაში.

ადგილობრივების თქმით, ტრაგედიას წინ რამდენიმე მოზარდს შორის დაპირისპირება და ჩხუბი უძღოდა. ირკვევა, რომ როგორც მოკლული, ისე დაკავებული 17 წლისები არიან.

გარდაცვლილი მოზარდის ოჯახსა და ახლობლებს სამძიმარს უცხადებს თბილისის 23-ე სკოლა, სადაც დავით ნარიმანიძე მე-10 კლასამდე სწავლობდა:

„იგი გამორჩეული იყო თავისი წესიერებით, კეთილშობილებით, ზრდილობითა და საუკეთესო თვისებებით. ვუსამძიმრებთ დავითის ოჯახის წევრებს, ახლობლებს, მასწავლებლებსა და მეგობრებს ამ უდიდეს და უმძიმეს დანაკარგს“, - აღნიშნულია სკოლის სამძიმრის წერილში.