"ნუ დაანგრევთ"- იტალიური სტუდიო Fuksas რიყის დოქებთან დაკავშირებით, თბილისის მერიასა და შენობის მფლობელებს მიმართავს

იტალიური არქიტექტურული სტუდია Fuksas-ი თბილისში, რიყის პარკში მდებარე საკონცერტო დარბაზის (ე.წ. „რიყის დოქების“) დემონტაჟის სასწრაფოდ შეჩერებას და შენობისთვის ახალი, ალტერნატიული ფუნქციის მოძებნას ითხოვს.

გამოცემა Dezeen-ისთვის გაგზავნილ განცხადებაში სტუდია აღნიშნავს, რომ ბოლო ერთი წლის განმავლობაში არაერთხელ შეეცადა თბილისის მერიასა და შენობის მფლობელებთან დაკავშირებას, თუმცა პასუხი ვერავისგან მიიღო.

„ბოლო თვეების განმავლობაში ჩვენი სტუდია მუდმივად სთავაზობდა თანამშრომლობას საქართველოს ხელისუფლებას, რათა ერთად მოგვეძებნა ისეთი გამოსავალი, რომელიც ამ სიმბოლურ ნაგებობას შეუნარჩუნებდა სიცოცხლეს. გვინდოდა თავიდან აგვეცილებინა ნაჩქარევი და შეუქცევადი ნგრევა, თუმცა, სამწუხაროდ, ჩვენს წინადადებებს არავინ გამოხმაურებია“, — აცხადებენ არქიტექტორები.

ცნობილი არქიტექტორები და სტუდიის დამფუძნებლები, მასიმილიანო და დორიანა ფუქსასები, შენობის მფლობელს გადაწყვეტილების შეცვლისკენ მოუწოდებენ. მანამდე ქართულ მედიაში გავრცელდა ინფორმაცია, რომ თბილისის მერიამ რიყის პარკში მდებარე საკონცერტო დარბაზის დემონტაჟის ნებართვა გასცა.

ეს უნიკალური ფორმის შენობა 2010–2012 წლებში აშენდა, თუმცა საზოგადოებისთვის დღემდე არ გახსნილა. 15-წლიანი უფუნქციობის შემდეგ კი, მას ახლა დანგრევა ემუქრება. ნაგებობა თავდაპირველად თბილისის ბიუჯეტიდან დაფინანსდა და მისი მშენებლობა დაახლოებით 40 მილიონი ევრო დაჯდა. 2022 წელს ის 10 მილიონ ევროდ კერძო მფლობელზე გაიყიდა. სტუდიო Fuksas-ის განცხადებით, შენობის დემონტაჟისთვისაც კი დამატებითი საბიუჯეტო სახსრების დახარჯვა იქნება საჭირო.

„საერთაშორისოდ აღიარებული და დაჯილდოებული არქიტექტურული ნიმუშის დაკარგვა ჩვენი კულტურისთვის დიდი უკან გადადგმული ნაბიჯი იქნება. თანაც, ეს შენობა ხალხის ფულით აშენდა და მისი დანგრევაც დამატებით ხარჯებს მოითხოვს, ნაცვლად იმისა, რომ ვიფიქროთ მისი ხელახლა გამოყენებისა და რეაბილიტაციის პოტენციალზე.

ამ დარბაზის ნგრევა ნიშნავს, რომ თბილისი უარს ამბობს უნიკალურ კულტურულ აქტივზე — კლასიკური მუსიკის დარბაზსა და თანამედროვე ხელოვნების დიდ სივრცეზე, რომელიც სრული განახლების შემთხვევაში მომავალ თაობებს კიდევ დიდხანს გამოადგებოდა“, — ნათქვამია განცხადებაში.

არქიტექტორები მწვავედ აკრიტიკებენ როგორც შენობის დანგრევის გადაწყვეტილებას, ისე მერიისა და მფლობელების მხრიდან კომუნიკაციის სრულ არარსებობას. ამ ეტაპზე უცნობია, რა იგეგმება მის ადგილას, თუმცა მანამდე ამ ტერიტორიაზე სასტუმროს მშენებლობა განიხილებოდა.

„ჩვენი 60-წლიანი პროფესიული საქმიანობის განმავლობაში პირველად ხდება, როდესაც ჩვენს პროექტს ისე ანგრევენ, რომ ალტერნატივების განსახილველად ერთხელაც არ დაგვკავშირებიან. მიუხედავად ჩვენი მზაობისა, არც სახელმწიფო უწყებებს და არც სხვა დაინტერესებულ პირებს ჩვენთან დიალოგი არ უცდიათ. სტუდიო Fuksas-ი კატეგორიულად ეწინააღმდეგება როგორც ნგრევას, ისე ამ საკითხზე ღია დისკუსიის არარსებობას.

თბილისს ჯერ კიდევ აქვს შანსი, დაუსრულებელი პროექტი განახლების, ინოვაციისა და საერთაშორისო ღიაობის სიმბოლოდ აქციოს. ნუ გავუშვებთ ამ შესაძლებლობას ხელიდან“, — აცხადებენ არქიტექტორები.