ქართველი ფოტოხელოვანი ბაკურ თვრინელი ნიუ-იორკში ახალ სივრცეს ქმნის - ფოტოგრაფია, გალერეა და კულტურული დიალოგი

ნიუ-იორკის Lower East Side-ში ქართველი ფოტოხელოვანის, ბაკურ თვრინელის, მიერ დაფუძნებული ახალი სივრცე - The White Loft ოფიციალურად გაიხსნა. სტუდიის გახსნას ესწრებოდნენ საერთაშორისო ჟურნალების წარმომადგენლები, პროდიუსერები, ფოტოგრაფები, გამომცემლები და თანამედროვე არტისტები.

The White Loft წარმოადგენს ფოტოსტუდიას, გალერეასა და ღონისძიებების სივრცეს, რომელიც ფოტოგრაფიასა და ვიზუალურ კულტურას ეძღვნება. სივრცის კონცეფცია ეფუძნება ფოტოგრაფიის დაფასებას, მის მხარდაჭერასა და კულტურულ თუ ბრენდულ ინიციატივებთან ორგანულ კავშირს.

„The White Loft შეიქმნა როგორც სივრცე, რომელიც ფოტოგრაფებსა და ხელოვანებს ერთმანეთთან აკავშირებს, ხელს უწყობს დიალოგს და ახალ ხედვებს უყრის საფუძველს“, - აცხადებს ბაკურ თვრინელი.

სტუდიის გახსნისას ბაკურ თვრინელმა ასევე აღნიშნა, რომ The White Loft ქმნის პლატფორმას თანამშრომლობისა და შემოქმედებითი გაცვლისთვის. ასახავს ნიუ-იორკის არტისტული საზოგადოების ენერგიას, მრავალფეროვნებასა და ინოვაციურ სულს.

The White Loft უკვე პოზიციონირდება, როგორც ახალი მნიშვნელოვანი სივრცე ნიუ-იორკის თანამედროვე ფოტოგრაფიული და ვიზუალური კულტურის რუკაზე და ქმნის ახალ შესაძლებლობებს საერთაშორისო შემოქმედებითი თანამშრომლობისთვის.

ვინ არის ბაკურ თვრინელი

ბაკურ თვრინელი არის ქართველი ფოტოხელოვანი, რომელიც წლების განმავლობაში თანამშრომლობდა მსოფლიოს წამყვან მოდისა და კულტურის გამოცემებთან. მისი შემოქმედება გამოირჩევა კონცეპტუალური მიდგომითა და ვიზუალური ექსპერიმენტებით.

განსაკუთრებული ადგილი მის კარიერაში უჭირავს არტ-ედიტორიალს „Ultra-Marine“, რომელიც ბრიტანელი არტისტის, ალექს ფოქსტონის, ფერწერული ნამუშევრების შთაგონებით შეიქმნა და გამოქვეყნდა პოპულარულ გერმანულ გამოცემაში PURPLEHAZE.

ნიშანდობლივია, რომ ბაკურ თვრინელის ბოლო ნამუშევრები გამოქვეყნდა ერთ-ერთ ყველაზე ავტორიტეტულ ფრანგულ გამოცემაში - L’Équipe Magazine-ში.

ბაკურ თვრინელი ასევე იყო წარმატებული პროექტის MEET GEORGIA იდეის ერთ-ერთი ავტორი, არტდირექტორი და გამომცემელი. ამასთან, იგი არის პლატფორმა NATION GEORGIA (nation.ge)-ის თანადამფუძნებელი.