საპატრიარქო რეჟისორ დათა თავაძისა და თეატრის წინააღმდეგ - “ამგვარი მკრეხელობის ჩამდენი ეკლესიიდან განკვეთას ექვემდებარება”

მართლმადიდებელი ეკლესიის საპატრიარქო სამეფო უბნის თეატრის რეჟისორის, დათა თავაძის სპექტაკლ „ლიბერტეს“ (Liberté) „ღვთისმგმობელ წარმოდგენას“ და „მკრეხელობას“ უწოდებს და საზოგადოებას შეახსენებს „მოვალეობას, მართლებულად შეაფასოს“ იგი. საპატრიარქო „განკვეთით“ ემუქრება „ღონისძიების შემოქმედებს“.
საქართველოს მართლმადიდებელი ეკლესიის საპატრიარქო 8 მაისს გამოეხმაურა დათა თავაძის სპექტაკლს, რომელიც ბიძინა ივანიშვილის ბიზნესპარტნიორის, ირაკლი რუხაძის კუთვნილმა პროსახელისუფლები ტელეკომპანია „იმედმა“ ორი დღით ადრე ჰომოფობიის გამაღვივებელი ტექსტით დაადანაშაულა „რელიგიური გრძნობების შეურაცხყოფაში“.

სამეფო უბნის თეატრის ერთ-ერთი ყველაზე პოპულარულ სპექტაკლზე, რომელიც შეიცავს ფრაგმენტებს მე-18 საუკუნის ფრანგი მწერლის, მარკიზ დე სადის ნაწარმოებიდან, „ფილოსოფია ბუდუარში ანუ უზნეო აღმზრდელნი“, 18 წლამდე ასაკის მაყურებელი არ დაიშვება; ასევე, ფოტო-ვიდეოგადაღება აკრძალულია - თუმცა „იმედმა“ ნაწყვეტები გაუშვა ეთერში. „იმედმა“ დაასახელა სპექტაკლის ოთხივე მსახიობიც.

რეჟისორი დათა თავაძე „ქართული ოცნების“ სადავო მთავრობის საწინააღმდეგო, პრო-ევროპული დემონსტრაციების ერთ-ერთი მონაწილეა - თეატრის სხვა არაერთ წარმომადგენელთან ერთად. კიდევ ერთი რეჟისორი, დავით დოიაშვილი „ახალი თეატრის“ ხელმძღვანელობას აპრილში ჩამოაშორეს, რის შემდეგაც სამეფო უბნის თეატრმა მას სოლიდარობა გამოუცხადა.

„იმედის“ გაშუქების შემდეგ, 8 მაისს, სამეფო უბნის თეატრთან პრორუსული ფიგურების - დიმიტრი ლორთქიფანიძის, გურამ ფალავანდიშვილის, გრიშა ონიანის და სხვათა - ორგანიზებითა და მონაწილეობით საპროტესტო აქცია გაიმართა. საპატრიარქომ განცხადება ფეისბუკზე აქციის აქციის შემდეგ, საღამოს ათის ნახევარზე გამოაქვეყნა.