თითქოს იმ პატარა გოგოს ხელი ჩაჰკიდეს და ჩაეხუტნენ, მე აღარ მტკივა სული - ნატა ვიბლიანი

ნატა ვიბლიანის საქმეს, რომელმაც საზოგადოება ბავშვობის უმძიმესი ტრაგედიის, სისტემატური სექსუალური ძალადობისა და ჩვილის სავარაუდო მკვლელობის/გაყიდვის მხილებით შეძრა, ახალი განვითარება აქვს. მას შემდეგ, რაც შინაგან საქმეთა სამინისტრომ ქალის საჯარო განცხადებების საფუძველზე გამოძიება დაიწყო, მის ინტერესებს უფასოდ დაიცავს ადვოკატთა ძლიერი გუნდი.

სოციალურ ქსელში გამოქვეყნებულ ემოციურ მიმართვაში ნატა ვიბლიანი საზოგადოებას მხარდაჭერისთვის მადლობას უხდის და აცხადებს, რომ ამიერიდან მის საქმეს სამართლებრივად ტარიელ კაკაბაძე და მარიამ ბარსონიძე უხელმძღვანელებენ:

„ჩემო ძვირფასებო, მოგმართავთ ყველას. დღეს იმაზე მეტად ბედნიერი ვარ, ვიდრე წარმოდგენა შემეძლო. მთელი ცხოვრება მარტო ვიყავი, ახლა კი ჩემი საქართველოა ჩემს გვერდით. ქედს ვიხრი თითოეული თქვენგანის წინაშე.

ამ უსამართლო და უთანასწორო ბრძოლაში ჩემს გვერდით, სრულიად უსასყიდლოდ, ყოველგვარი ანაზღაურების გარეშე, დადგა ბატონი ტარიელ კაკაბაძე თავის უძლიერეს გუნდთან ერთად. დღეიდან ნებისმიერ საკითხზე, რომელიც ეხება ჩემი – ნესტან (ნატა) ვიბლიანის საქმეს, გთხოვთ, მიმართოთ ბატონი ტარიელის გუნდის წევრს, ძვირფას ადამიანსა და ადვოკატს, ქალბატონ მარიამ ბარსონიძეს.

ყველა საკითხი უნდა შეთანხმდეს ქალბატონ მარიამთან – იქნება ეს კერძო პირი, ტელევიზია, ჟურნალისტი თუ დამოუკიდებელი ორგანიზაცია. არ არსებობს სიტყვები, რომლებითაც ჩემი სიხარულის გადმოცემას შევძლებდი. თითქოს იმ პატარა გოგოს ხელი ჩაჰკიდეს და ჩაეხუტნენ. მე აღარ მტკივა სული, ჩემო საქართველო. მიყვარხართ!“

შეგახსენებთ, რომ ნატა ვიბლიანი, რომელიც ამჟამად საზღვარგარეთ იმყოფება, 35 წლის წინ, ჭუბერის თემში მომხდარ უმძიმეს დანაშაულებზე ყვება. იურისტების შეფასებით, ვინაიდან საქმე არასრულწლოვნის წინააღმდეგ ჩადენილ წამებასა და სექსუალურ ძალადობას ეხება, ამ ეპიზოდებს ხანდაზმულობის ვადა არ გააჩნია, რაც დამნაშავეების პასუხისგებაში მიცემის სამართლებრივ შესაძლებლობას დღესაც იძლევა.

ნატა ვიბლიანის ისტორია ვრცლად წაიკითხეთ ბმულზე

სექსუალური ძალადობა ბავშვზე, გაუჩინარებული ჩვილი და გარიყვა სოფლიდან – ნატა ვიბლიანის მძიმე აღსარება და 35 წლის შემდეგ დაწყებული გამოძიება