"ვცდილობ, წმინდა ნინოს მოძღვრებას მივყვე" - მოროშკინამ თელავის ინციდენტში მონაწილე რუსულენოვან ტურისტებს უმასპინძლა

თელავში, სასტუმრო Agarani Estate-ში მომხდარი ხმაურიანი ინციდენტის შემდეგ, რუსულენოვან ტურისტებს სიღნაღში „ქართული ოცნების“ მხარდამჭერმა ლალი მოროშკინამ უმასპინძლა. ამის შესახებ მან სოციალურ ქსელში თავად დაწერა:

„და განა ამათ შეეძლოთ დიდი ქართული სუფრული ერთობისა და ბედნიერების ჩაშლა? კარგით რა... მე 8 წელია კახეთში ვარ... ვცდილობ, წმინდა ნინოს მოძღვრებას მივყვე. მიყვარს მოყვასი, ვლოცულობ, ვზრდი ახალ თაობას, ბევრს ვმუშაობ და ვაღიარებ, რომ მაქვს ერთი დიდი ცოდვა — ვერ ვპატიობ ღალატს...

დღეს ვმასპინძლობდი შეშინებულ, ნაცემ, ბავშვურ სილაღეშერჩენილ უკრაინელ და რუს გოგონებს, რომლებიც საქართველოზე მოყოლილი თითოეული ისტორიის ფინალში ტიროდნენ. ერთმანეთის მონაცვლეობით, უკრაინულ-რუსულად თავიანთ ისტორიებს ყვებოდნენ... რა სამწუხაროა, რომ ადვოკატის გარეშე ვერც კი გადაადგილდებიან. ე შ ი ნ ი ა თ...

მათი ადვოკატი ლალი აფციაურია. ეს ის ლალი აფციაურია, რომელთან ერთადაც ორმა ქალმა (არ ვამეტებ) 2011 წელს გლდანის ციხის ბუნტი ჩავახშეთ... ალბათ კარმულია ჩემი და ლალის შეხვედრა კონფლიქტის დროს... არ არსებობს ცუდი ერი, არსებობენ უზრდელი ადამიანები ან აგენტურული ქსელის ოფიცრები...

P.S. „დღეს სტუმარია ეგ ჩემი, თუნდ ზღვა ემართოს სისხლისა...“ არადა, სტუმრად 5 შეშინებული სლავი გოგო მყავდა...“ — წერს ლალი მოროშკინა.

ინციდენტი თელავში, სასტუმრო Agarani Estate-ში რამდენიმე დღის წინ მოხდა.

• გავრცელებული ინფორმაციით: ქორწილის სტუმრებს რუსულენოვანმა ქალებმა ნომრის აივნიდან შეურაცხყოფა მიაყენეს და სხვადასხვა სახის სითხე გადაასხეს.

• ამის შემდეგ მათთან ნომერში ქორწილის მონაწილე დასალაპარაკებლად ავიდა, რასაც ფიზიკური დაპირისპირება მოჰყვა.

• მოგვიანებით, უცხოეთის მოქალაქეებმა დამონტაჟებული ვიდეო სოციალურ ქსელში გაავრცელეს და ამტკიცებდნენ, რომ ქართველი კაცი მათ თავს რუსულ ენაზე საუბრის გამო დაესხა.

მომხდარი ინციდენტის გამო სამართალდამცავებმა გიორგი ჭიღლაძე დააკავეს.

გამოძიება საქართველოს სისხლის სამართლის კოდექსის 120-ე მუხლით დაიწყო, რაც ჯანმრთელობის განზრახ მსუბუქ დაზიანებას გულისხმობს და 3 წლამდე ვადით თავისუფლების აღკვეთას ითვალისწინებს.

ბრალდებული სასამართლომ 5 000-ლარიანი გირაოს სანაცვლოდ გაათავისუფლა.