მძიმე ავარია და ხანძარი ნიუ-იორკში: დაკავებულია 27 წლის ქართველი მძღოლი

აშშ-ში, ნიუ-იორკის შტატის ქალაქ მედფორდში მომხდარმა მძიმე ავტოკატასტროფამ და შეჯახების შედეგად გაჩენილმა ხანძარმა ორი ადამიანი დააზიანა, გაანადგურა რამდენიმე სატვირთო ავტომობილი და გარემოსდაცვითი პრობლემები შექმნა.

ამერკული მედიის ცნობით, ინციდენტი პეკონიკ-ავენიუზე, 31 ივლისს, პარასკევს დღის პირველ ნახევარში მოხდა. ავტომობილების გადამზიდი  ძლიერად შეეჯახა კომპანია „Star Ready Mix Incorporated“-ის ბეტონმზიდს, რომელიც საწარმოს ტერიტორიიდან გამოდიოდა.

შეჯახებას მყისიერად მოჰყვა ძლიერი აფეთქება და ხანძარი. ცეცხლი იმდენად სწრაფად გავრცელდა, რომ უშუალოდ ავარიაში მონაწილე ტრანსპორტის გარდა, ეზოში გაჩერებული კიდევ ორი სატვირთო ავტომობილიც დაიწვა.

ავარიის შედეგად ორივე მძღოლი დაშავდა. ისინი სასწრაფო დახმარების ბრიგადამ სტოუნი ბრუკის უნივერსიტეტის საავადმყოფოში გადაიყვანა. ექიმების ცნობით, მათ სიცოცხლეს საფრთხე არ ემუქრება.

სამართალდამცველებმა ადგილზე დააკავეს ავტომობილების გადამზიდის მძღოლი — 27 წლის ხვიჩა მალაკმაძე, რომელიც პენსილვანიის შტატში ცხოვრობს.

პოლიციის ცნობით, მალაკმაძეს ბრალი ნარკოტიკული ნივთიერების ზემოქმედების ქვეშ ავტომობილის მართვისთვის (DWAI) წაუყენეს. გამოძიება ამ ეტაპზე არ აკონკრეტებს, თუ რა სახის ნივთიერება აღმოაჩნდა მძღოლს.

კომპანია „Star Ready Mix Incorporated“ აცხადებს, რომ ხანძარმა საწარმოს მძიმე მატერიალური ზიანი მიაყენა, რამაც შესაძლოა მათი საქმიანობის შეჩერება გამოიწვიოს.

ავარიის შედეგად ავზებიდან დაახლოებით 70 გალონი (265 ლიტრი) დიზელის საწვავი დაიღვარა, რამაც ოთხი სანიაღვრე ჭა დააბინძურა.

ადგილზე მობილიზებული იყო ნიუ-იორკის შტატის გარემოს დაცვის დეპარტამენტი. სპეციალურმა ჯგუფებმა შაბათ დილამდე იმუშავეს საწვავის ლიკვიდაციაზე. სააგენტოს განცხადებით, სასმელ წყალსა და ახლომდებარე წყალსაცავებს საფრთხე არ ემუქრება.