საქართველოდან მიმავალი ავტობუსის მძიმე ავარია რუსეთში - დაღუპულია 6 და დაშავებულია 28 ადამიანი, მათ შორის 11 ბავშვი (ფოტოები)

სტავროპოლის მხარეში, ჟელეზნოვოდსკის რაიონში, ფედერალური ავტომაგისტრალ „კავკაზის“ მე-3 კილომეტრზე, 30 აგვისტოს ღამით მძიმე ავტოსაგზაო შემთხვევა მოხდა.

წინასწარი მონაცემებით, დაახლოებით 01:00 საათზე, ავტობუს „Setra“-ს მძღოლმა, რომელიც მარშრუტზე „საქართველო — მოსკოვი“ გადაადგილდებოდა, სიჩქარეს გადააჭარბა, დისტანცია ვერ დაიცვა და წინ მიმავალ „კამაზის“ მარკის სატვირთოს შეეჯახა. შეჯახების შედეგად ავტობუსი გზის სავალი ნაწილიდან გადავიდა და თხრილში გადავარდა. ავტობუსში სულ 43 ადამიანი იმყოფებოდა.

ავარიის შედეგად 5 მგზავრი ადგილზე გარდაიცვალა, ხოლო მოგვიანებით კიდევ ერთი დაშავებული პიატიგორსკის ცენტრალური საავადმყოფოს რეანიმაციულ განყოფილებაში გარდაიცვალა. ამრიგად, დაღუპულთა რაოდენობა 6-მდე გაიზარდა.

სტავროპოლის საგზაო ინსპექციის ბოლო მონაცემებით, საავადმყოფოში 28 ადამიანია გადაყვანილი, მათგან 11 ბავშვი და მოზარდია. სტავროპოლის მხარის გუბერნატორ ვლადიმირ ვლადიმიროვის განცხადებით, ოთხი დაშავებულის მდგომარეობა მძიმეა და ისინი რეანიმაციაში იმყოფებიან. დაშავებულთა დასახმარებლად სტავროპოლიდან დამატებითი სამედიცინო ბრიგადები გაიგზავნა.

ფაქტზე აღძრულია სისხლის სამართლის საქმე საგზაო მოძრაობისა და ტრანსპორტის ექსპლუატაციის წესების დარღვევის მუხლით, რამაც გაუფრთხილებლობით ორი ან მეტი პირის სიცოცხლის მოსპობა გამოიწვია. ადგილზე სამართალდამცველები მუშაობენ.