თუშეთში, სოფელ შენაქოს ხიდთან გზის საფუძველი ჩამოიშალა — მოძრაობა აკრძალულია

თუშეთის დაცული ლანდშაფტის ადმინისტრაციის ინფორმაციით, თუშეთში უხვი ნალექისა და თოვლის ინტენსიური დნობის შედეგად, მდინარეების დონემ კრიტიკულ ზღვარს მიაღწია, რის გამოც სოფელ შენაქოს საავტომობილო ხიდის მისასვლელ მონაკვეთზე წყლის ნაკადმა სრულად გამორეცხა საყრდენი, რამაც გზის საფუძვლის მთლიანი ჩამოშლა გამოიწვია.

"გაცნობებთ, რომ თუშეთში მოსული უხვი ნალექისა და თოვლის ინტენსიური დნობის შედეგად, მდინარეების დონემ კრიტიკულ ზღვარს მიაღწია. შექმნილი სტიქიური მოვლენების გამო, სოფელ შენაქოს საავტომობილო ხიდის მისასვლელ მონაკვეთზე წყლის ნაკადმა სრულად გამორეცხა საყრდენი, რამაც გზის საფუძვლის მთლიანი ჩამოშლა გამოიწვია.

აღნიშნული ხიდი ერთადერთი სატრანსპორტო არტერიაა, რომელიც სოფლებს — შენაქოსა და დიკლოს აკავშირებს სოფელ ომალოსთან, ისევე როგორც ბარის მიმართულებასთან.

მნიშვნელოვანი რეკომენდაცია მოსახლეობისა და ვიზიტორებისთვის: თუ იმყოფებით სოფელ შენაქოს ან დიკლოს ტერიტორიაზე, გთხოვთ, დარჩეთ სახლებში/საოჯახო სასტუმროებში და თავი შეიკავოთ ხიდის მიმართულებით გადაადგილებისგან.

უსაფრთხოების ზომები და შეზღუდვები:

• მკაცრად აკრძალულია დაზიანებულ საგზაო მონაკვეთთან ტრანსპორტით მიახლოება, ვინაიდან გრუნტის ჩამოშლის პროცესი კვლავ დინამიურია და საფრთხეს უქმნის ადამიანების სიცოცხლეს.

• ნებისმიერი ლოგისტიკური, სამედიცინო თუ გადაუდებელი საჭიროების შემთხვევაში, დაუყოვნებლივ დაუკავშირდით შესაბამის სამსახურებს.

საგანგებო კონტაქტები:

• საგანგებო სიტუაციების მართვის სამსახური:  112

• ადმინისტრაცია: +995 599 004 972 (ლადო კახოიძე)

შექმნილი ვითარების შესახებ ოპერატიულად არის ინფორმირებული ყველა პასუხისმგებელი სახელმწიფო უწყება. ამ წუთებში მიმდინარეობს კოორდინირებული მუშაობა პრევენციული ღონისძიებებისა და შემდგომი ნაბიჯების დასაგეგმად.

ომალო - შენაქო - დიკლოს საავტომობილო გზაზე მოძრაობის აღდგენისა და მიმდინარე სამუშაოების შესახებ ინფორმაცია ეტაპობრივად გავრცელდება." - აღნიშნულია განცხადებაში.